Gaza sektorynda ustalǵan sońǵy tutqynnyń denesi Izraılge qaıtarylady
Gaza sektorynda sońǵy tutqyn retinde eseptelip kelgen ızraıldik polıtsııa qyzmetkeri Ran Gvılıdiń máıiti jerleý úshin Izraılge jetkiziledi, dep habarlaıdy Kazinform agenttiginiń menshikti tilshisi.
Izraıl qorǵanys armııasy (TsAHAL) dúısenbi kúni Gaza qalasynyń shyǵys bóligindegi musylman zıratynda júrgizilgen izdestirý operatsııasy barysynda polıtsııanyń aǵa serjanty Ran Gvılıdiń súıegi tabylyp, jeke basy anyqtalǵanyn málimdedi.
The Times of Israel basylymynyń habarlaýynsha, áskerı ókilder marqumnyń otbasyn habardar etken, máıit Izraılge jerleý úshin jetkiziledi.
Izraıl tarapynyń derekterine sáıkes, sáıkestendirý júrgizý úshin shamamen 250 máıit eksgýmatsııalanyp, tekserilgen. Gvılıdiń jeke basy stomatologııalyq derekter, saýsaq izderi jáne basqa da saraptamalar arqyly rastaldy. Qalǵan barlyq máıit qaıta jerlenip, zırat aýmaǵy retke keltiriledi.
The deceased hostage SFC Ran Gvili has been identified and will be returned for burial.
— Israel Defense Forces (@IDF) January 26, 2026
According to the information and intelligence available to us, SFC Ran Gvili, 24, who served in the Israeli Police Special Forces, fell in combat on the morning of Oct. 7, 2023, and his body… https://t.co/K4vFVsF60r pic.twitter.com/TN2CWMpKEM
24 jastaǵy polıtsııa qyzmetkeri Ran Gvılı 2023 jylǵy 7 qazanda palestınalyq HAMAS tobynyń shabýyly kezinde Izraıldiń ońtústigindegi Alýmım kıbýtsyn qorǵaý barysynda qaza tapqan. Ol sol kúni tutqynǵa alynǵan 251 adamnyń ishinde súıegi áli qaıtarylmaǵan sońǵy adam sanalyp kelgen.
Izraıl bıliginiń málimdeýinshe, 2014 jyldan beri alǵash ret Gaza sektorynda ustalyp otyrǵan tutqyndar qalmaǵan.
Izraıl premer-mınıstri Bınıamın Netanıahý Gvılıdiń denesiniń qaıtarylýyn «aıryqsha jetistik» dep atady.
— Biz bárin qaıtaramyz dep ýáde berdik jáne bárin — sońǵysyna deıin qaıtardyq. Ranı — Izraıldiń batyry. Ol birinshi bolyp kirip, sońǵy bolyp shyqty, — dedi ol Knessette jýrnalısterge.
Izraıl qorǵanys mınıstri Israel Kats bul oqıǵany «aýyr ári aıaqtalý sáti» dep sıpattady.
— Bul memlekettiń óz sarbazdary men azamattary aldyndaǵy mindetin — árqaısysyn úıine qaıtarý jaýapkershiligin rastaıdy, — delingen mınıstr keńsesiniń málimdemesinde.
TsAHAL dereginshe, Gvılıdiń jerlenýi múmkin oryn týraly aqparat burynnan bolǵan, alaıda sońǵy aptalarda barlaý operatsııalary men HAMAS-tan deldaldar arqyly alynǵan málimetter negizinde naqtylanǵan.
Іzdestirý jumystary atysty toqtatý syzyǵy mańynda júrgizilip, qaýipsizdik maqsatynda keıbir bólimsheler syzyqtyń arǵy betinde áreket etken.
Qańtardyń ortasynda AQSh bıligi AQSh prezıdenti Donald Tramptyń Gaza sektoryndaǵy soǵysty toqtatýǵa baǵyttalǵan josparynyń birinshi kezeńi aıaqtalyp, ekinshi kezeńge ótý bastalǵanyn jarııalaǵan bolatyn.