Gaza sektorynda úshinshi jyl qatarynan 660 myń bala mektepke bara almaı júr
ASTANA. KAZINFORM — Izraıldiń Gaza sektoryndaǵy 23 aıǵa sozylǵan soǵysy saldarynan 660 myń bala úshinshi jyl qatarynan mektepke bara almaı otyr, dep jazady Anadoly.
Bul týraly BUU-nyń Palestına bosqyndaryna kómek kórsetý jáne jumys uıymdastyrý jónindegi Taıaý Shyǵys agenttigi (BAPOR) habarlady.
BAPOR-dyń jazbasha málimdemesinde Gaza sektoryndaǵy soǵys — bul balalarǵa qarsy soǵys ekeni aıtylyp, ony dereý toqtatý qajet ekeni basa kórsetilgen.
— Balalar árqashan qorǵalýy tıis, — delingen habarlamada.
Sonymen qatar málimdemede balalardyń bilim alýǵa degen quqyǵy erekshe atalyp ótti:
«660 myń bala úshinshi jyl qatarynan soǵys kesirinen mektepke bara almaı otyr».
Agenttik Gaza sektoryndaǵy balalardyń «joǵalǵan urpaqqa» aınalý qaýpi bar ekenin aıtyp, soǵysty toqtatyp, balalarǵa bilimge jáne qalypty ómirge qaıta oralýǵa múmkindik berýge shaqyrdy.
Palestınadaǵy Orta jáne Joǵary bilim mınıstrligi 28 tamyzda Batys jaǵalaýdaǵy jańa oqý jyly qyrkúıek aıynyń basynda bastalatynyn habarlady.
Mınıstrlik málimdemesinde Gaza sektorynda shamamen 700 myń oqýshy eki jylǵa sozylǵan aýyr jaǵdaılar men tikeleı shabýyldar saldarynan oqýlaryn jalǵastyra almaǵany aıtyldy. Sondaı-aq 70 myńnan astam oqýshy eki oqý jyly boıy orta mektepke bara almaǵan.
Palestına Bilim mınıstrliginiń 2023 jylǵy 7 qazan men 2025 jylǵy 26 tamyz aralyǵyndaǵy sońǵy derekterine sáıkes, Izraıl bul ýaqyt aralyǵynda Gaza sektorynda 17 myńnan astam bastaýysh, orta jáne joǵary synyp oqýshylaryn, sondaı-aq 1 261 ýnıversıtet stýdentin óltirgen. Budan bólek 25 myńnan astam mektep oqýshysy men 2 671 ýnıversıtet stýdenti jaralanǵan.
Osy ýaqyt ishinde Batys jaǵalaýda Izraıl shamamen 108 mektep oqýshysy men 35 ýnıversıtet stýdentin óltirip, 739 oqýshy men 231 stýdentti jaralaǵan, 372 oqýshy men 413-ten astam ýnıversıtet stýdentin qamaýǵa alǵan.
Mınıstrliktiń deregi boıynsha, Gaza sektorynda Izraıl 739 mektep muǵalimi men 226 ýnıversıtet oqytýshysyn óltirip, 3 091 mektep qyzmetkeri men 1 421 ýnıversıtet mamanyn jaralaǵan.
Batys jaǵalaýda da Izraıl áskeri bes muǵalimdi óltirip, 21 muǵalimdi jaralaǵan jáne 182 muǵalimdi, sondaı-aq 17 ýnıversıtet qyzmetkerin tutqyndaǵan.
2023 jylǵy 7 qazannan beri Izraıl AQSh-tyń qoldaýymen Gaza sektorynda jappaı qyrǵyn, asharshylyq, qıratý jáne kúshpen kóshirý áreketterin jalǵastyryp keledi. Bul áreketter halyqaralyq qaýymdastyqtyń úndeýlerine jáne Halyqaralyq ádilet sotynyń shabýyldardy toqtatý týraly sheshimderine qaramastan jalǵasyp otyr.
Genotsıd saldarynan 63 371 palestınalyq qaza tapty, olardyń basym bóligi — áıelder men balalar. 159 835-ten astam adam jaralandy, 9 myńnan astamy iz-túzsiz joǵalyp ketti. Júzdegen myń adam úılerin tastap ketýge májbúr boldy. Ashtyqtan 332 adam kóz jumdy, onyń 124-i — balalar.
Budan buryn Gaza sektorynda taǵy bir sábı ashtyqtan kóz jumǵanyn jazǵan edik.