Gaza sektorynda úsh jyl buryn qaza tapqan 55 adamnyń máıiti tabyldy
ASTANA. KAZINFORM – Gaza sektorynyń azamattyq qorǵanys qyzmetkerleri Zeıtýn aýdanyndaǵy qıraǵan ǵımarattyń úıindisinen 2023 jylǵy qarashada Izraıl áskeriniń soqqysynan qaza tapqan 55 palestınalyqtyń máıitin alyp shyqty, dep habarlaıdy Anadolu.
Bul týraly Azamattyq qorǵanys basqarmasynyń qaza tapqandardyń máıitin izdeý jobasynyń jetekshisi Muhammed Abý Dan málimdedi.
Onyń aıtýynsha, qıraǵan ǵımarattaǵy izdeý jumystary úsh kúnnen beri jalǵasyp jatyr. Izraıl shabýyly kezinde bul ǵımaratta áýe soqqylarynan bas saýǵalaǵan 60-tan astam adam bolǵan.
Abý Dannyń sózinshe, úsh jylǵa jýyq ýaqyttan keıin tabylǵan máıitter kelesi aptada ortaq aza tutý rásimi kezinde jerlenedi.
Joba jetekshisi qajetti tehnıkanyń jetispeýine baılanysty jumystardyń óte kúrdeli jaǵdaıda júrgizilip jatqanyn aıtty. Ol halyqaralyq uıymdardy úıindi astynda qalǵan adamdardyń máıitterin shyǵarýǵa kómektesýge shaqyrdy.
Azamattyq qorǵanys basqarmasynyń baǵalaýynsha, Gaza sektorynyń soltústik jáne ortalyq bólikterinde Izraıl shabýyldarynan qıraǵan 147 ǵımarattyń úıindisi astynda 1072 adamnyń máıiti bolýy múmkin. Іzdeý jumystary jalǵasyp jatyr.
2025 jylǵy qarashanyń sońynda bastalǵan izdeý jumystarynyń alǵashqy kezeńinde azamattyq qorǵanys qyzmetkerleri iz-túzsiz joǵalǵandar sanatynda bolǵan 559 adamnyń shamamen 333-iniń máıitin úıindi astynan shyǵarǵan.
Gaza sektory úkimetiniń baspasóz qyzmeti 2025 jylǵy qazanda Izraıl shabýyldary bastalǵaly iz-túzsiz joǵalǵan palestınalyqtardyń sany 9,5 myńǵa jetkenin habarlaǵan edi. Bul sanǵa máıiti áli úıindi astynda jatqan qaza tapqandar men taǵdyry belgisiz adamdar da kiredi.
Eske sala kekteıik, buǵan deıin Gazada qıraǵan ǵımarat astynan eki áýlettiń 99 múshesiniń máıiti shyǵarylǵanyn jazdyq.
