Gaza sektorynda taǵy bir sábı ashtyqtan kóz jumdy

ASTANA. KAZINFORM – Gaza sektorynda Izraıldiń shabýyldary men tolyq qorshaýy saldarynan taǵy bir náreste ashtyqtan qaza tapty, dep habarlaıdy Anadolu.

Rantısı balalar aýrýhanasynyń málimetinshe, Ranııa Gaban esimdi sábı qajetti medıtsınalyq kómek pen azyq-túlik jetispeýshiliginen shetinep ketti. Dárigerlerdiń aıtýynsha, bul jaǵdaı – Izraıl júrgizip otyrǵan shabýyl men ashtyq saıasatynyń saldary.

Gaza densaýlyq saqtaý mınıstrliginiń derekterine sáıkes, 2023 jylǵy 7 qazannan beri ashtyq pen durys tamaqtanbaýdan kóz jumǵandar sany 332-ge jetti. Onyń ishinde 124-i – balalar.

Agenttiktiń habarlaýynsha, myńdaǵan júk kóligi gýmanıtarlyq júkterimen Mysyr jaǵyndaǵy «Rafah» ótkizý beketinde turyp qalǵan. Izraıl shekteýli kólemde ǵana kómekti ótkizýge ruqsat berýde.

Izraıl tarapy «gýmanıtarlyq sebeptermen» júk kirgizilip jatqanyn aıtsa da, Gaza bıligi onyń halyqtyń naqty qajettiliginiń tek 14 paıyzyn ǵana qamtyp otyrǵanyn málimdedi.

Sońǵy aıda kirgizilgen azyq-túlik pen kommertsııalyq taýarlardyń basym bóligi birinshi kezektegi qajettilikke jatpaıdy jáne jergilikti bazarlarda tym joǵary baǵamen satylyp jatyr.

Aıta keteıik, BUU Gazadaǵy ashtyqty toqtatý úshin kún saıyn júzdegen júk kóligin jetkizý kerektigin habarlaǵan bolatyn.