Gaza sektorynda shabýyldan qurban bolǵandar sany 37 myńnan asty
ASTANA. Kazinform – 2023 jyldyń 7 qazanynan beri Izraıldiń Gaza sektorynda jalǵasyp jatqan shabýyldarynan qurban bolǵandar sany 37 084-ke jetti. Bul týraly Palestına densaýlyq saqtaý mınıstrliginiń Gaza sektoryndaǵy málimdemesinde aıtyldy, dep jazady Anadolu.
Vedomstvo Izraıl armııasynyń Palestına anklavyna qurlyq, teńiz jáne áýe arqyly jappaı shabýyldary 247 kúnnen beri toqtamaǵanyn eske salady.
Mınıstrlik keltirgen derekke saı, tek sońǵy 24 saǵat ishinde Izraıl Gaza sektorynda segiz ret shabýyl jasap, saldarynan 283 adam qaza tapty, onyń ishinde Nýsaırat bosqyndar lagerinde 274 adam qaza taýyp, 698 adam aýyr jaraqat alǵan.
"2023 jyldyń 7 qazanynan beri Izraıldiń Gazaǵa jasaǵan shabýyldary nátıjesinde jaralanǵandar sany 84 494-ke jetti", - dep habarlady Gaza Densaýlyq saqtaý mınıstrligi.
Qaza tapqandardyń deneleri áli qıraǵan ǵımarattardyń astynda, jol jıekterinde jatyr. Jedel járdem jáne azamattyq qorǵanys toptary Izraıl kúshteri jasaǵan kedergilerge baılanysty olarǵa jete almaıdy.
Izraıl-Palestına qaqtyǵysy
2023 jyldyń 7 qazanynda tańerteń HAMAS-tyń áskerı qanaty «Izz ad-Dın ál-Qassam brıgadalary» Izraılge qarsy «Ál-Aqsa daýyly» operatsııasynyń bastalǵanyn jarııalady.
Gaza sektorynan Izraılge qaraı myńdaǵan zymyran atyldy, qarýly toptar Izraıl eldi mekenderine kirdi. HAMAS bul operatsııa Shyǵys Ierýsalımdegi ál-Aqsa meshitin basyp alýyna jáne ızraıldik qonystanýshylardyń palestınalyqtarǵa qarsy zorlyq-zombylyqtyń kúsheıýine jaýap retinde jasalǵanyn aıtty.
Buǵan jaýap retinde Izraıl armııasy Gaza sektorynda ondaǵan joıǵysh ushaqtardyń kómegimen HAMAS-qa qarsy «Temir qylyshtar» operatsııasyn bastaǵanyn jarııalap, ol gazalyqtardyń qyrǵynyna aınaldy. 27 qazanda Izraıl armııasy Gazada qurlyq operatsııalaryn bastady.
2,3 mıllıon Gaza halqy Izraıldiń jappaı áýe, qurlyq jáne teńiz bombalaýy men eksklavty tolyǵymen qorshaýynyń saldarynan azyq-túlik, sý jáne dári-dármek tapshylyǵynan zardap shegip otyr.
Myńdaǵan ǵımarat, sonyń ishinde aýrýhanalar, meshitter men shirkeýler Izraıldiń áýe jáne jerdegi shabýyldarynan zardap shekti nemese tolyǵymen qırady. Izraılde qurban bolǵandar sany 1200-den asty.
