Gaza sektorynda qumdy daýyl soqty
ASTANA. KAZINFORM — Gaza sektorynda qumdy daýyl soǵyp, palestınalyqtardyń jaǵdaıyn nasharlatty, dep habarlaıdy Anadolu.
Eki kúnge sozylǵan daýyl myńdaǵan otbasy turatyn tozyǵy jetken shatyrlardy zaqymdady. Palestınalyq WAFA aqparat agenttiginiń habarlaýynsha, qoıý shań men aspanǵa kóterilgen qum búkil anklavty basyp qaldy. Ýaqytsha shatyrly lagerlerde turatyndar zardap shekti.
Derekkózdiń habarlaýynsha, respıratorlyq dertke shaldyqqan palestınalyqtar qıyn kezeńdi bastan keshirip jatyr. Olar qatty jel men shańnyń áserinen dalada nemese buzylǵan shatyrlarda turýǵa májbúr. Qumdy daýyl aýyr jaǵdaıda ómir súrip jatqan otbasylardyń jaǵdaıyn odan ári kúıretip jatqany atap ótildi. Bul jaǵdaıǵa sozylmaly ókpe aýrýymen aýyratyndar alańdap otyr.
Buryn Izraıldiń shabýyldaryna tótep bergen palestınalyqtar azyq-túlik, dári-dármek jáne basqa da qajetti zattardyń tapshylyǵyna baılanysty kúrdeli qıyndyqtarǵa tap bolǵan. Aýa raıynyń salqyndyǵy men qolaısyz klımattyq jaǵdaılar halyqtyń turmysyn álsiretip jiberdi.
Aıta keteıik, HAMAS-tyń Gaza sektoryndaǵy ókili Hazem Qasem Izraıldi qonys aýdarǵan palestınalyqtarǵa qarsy jańa shabýyl jasady dep aıyptap, bul oqıǵany kelisimderdi óreskel buzý dep atady. Onyń aıtýynsha, oqıǵa Beıbitshilik keńesiniń birinshi otyrysyna birneshe kún qalǵanda bolǵan.
Eske sala keteıik, 2025 jyldyń 6 qazanynda Izraıl men HAMAS delegatsııalary Mysyr, Katar, AQSh jáne Túrkııa medıatorlarynyń qatysýymen janjaldy retteý boıynsha janama kelissózderdi qaıta bastady. 9 qazanda taraptar AQSh prezıdenti Donald Tramp usynǵan beıbitshilik josparynyń birinshi kezeńin júzege asyrý týraly kelisimge qol qoıdy. 10 qazanda atysty toqtatý týraly kelisim kúshine endi.