Gaza sektorynda kóz jumǵan palestınalyq búldirshinniń ólimine qatysty tergeý bastaldy
ASTANA. KAZINFORM – Izraıldiń áskerıleri Gaza sektoryndaǵy soǵys kezinde qaza bolǵan beıbit turǵyndar men gýmanıtarlyq mıssııa qyzmetkerleriniń ólimine qatysty rezonans týdyrǵan birneshe oqıǵa boıynsha tergeý júrgizý qajet degen sheshimge keldi, dep habarlaıdy Kazinform agenttiginiń menshikti tilshisi.
Sársenbi kúni Izraıldiń áskerı prokýratýrasy 2024 jyldyń qańtar aıynda Gaza sektorynda qaza bolǵan Hınd Radjab esimdi palestınalyq búldirshin qyz ben onyń otbasy jáne eki jedel járdem qyzmetkeriniń ólimine qatysty qylmystyq tergeýdi bastaýǵa tapsyrma berdi.
Sol kúni Hınd Gaza qalasynda jaqyn týystarymen birge avtokólikte kele jatqanda Izraıl áskerıleri olarǵa oq jaýdyrǵan. Kóliktegilerdiń kóbi qaza bolǵanda, kishkentaı qyz basynda tiri qalyp, birneshe saǵat boıy Palestına Qyzyl Jarty Aı qoǵamynyń dıspecherlerimen telefon arqyly sóılesip, kómek surap jatqan.
Olarǵa jiberilgen jedel járdem kóligi de oqtyń astynda qalǵan. Tek 12 kún ótkennen keıin ǵana sol jerden Hınd pen onyń otbasynyń jáne eki medıtsına qyzmetkeriniń múrdesi tabyldy.
Qyzdyń qutqarý qyzmetimen sóılesken telefon jazbasy jarııa bolǵan boıda bul oqıǵa halyqaralyq deńgeıde keń rezonans týdyrdy.
Qylmystyq isti bastaýǵa Izraıl qorǵanys áskeriniń (TsAHAL) bas shtabyna qarasty bólimsheniń júrgizgen tekserýi sebep bolǵan.
Onyń qorytyndysy boıynsha áskerıler sol avtokólikke oq atqanyn alǵash ret moıyndady, aıtýynsha kóliktegiler aldyn ala jarııa etilgen evakýatsııa jolymen júrmeı, bular turǵan qarsy baǵytqa qaraı bet alǵan. Al buǵan deıin TsAHAL uıymy oqıǵa kezinde ol aımaqta Izraıl áskerıleri bolǵan joq dep málimdegen edi.
TsAHAL-dyń málimetine súıensek, áskerıler qyzdy qutqarýǵa kele jatqan Palestına Qyzyl Jarty Aı qoǵamynyń mashınasyna da oq atqan. Izraıl áskerıleri jedel járdem kóliginiń qozǵalysyn uıymdastyrýda zań buzýshylyqtar boldy dep sanaıtyndyqtan isti áskerı polıtsııaǵa tapsyrǵanyn habarlady.
Sonymen bir mezgilde Izraıldiń áskerı prokýratýrasy taǵy bir oqıǵa boıynsha qylmystyq tergeýdi bastaýǵa ókim shyǵardy. Onda 2025 jyly naýryz aıynda Rıfah eldi mekeninde shuǵyl qyzmettiń 15 qyzmetkeriniń qaza bolǵany aıtylady.
Ol kezde Izraıl áskerıleri jedel járdem men qutqarýshylardyń mashınalaryn jáne BUU-nyń avtokóligin atqylaǵan bolatyn. Tekserýshiler áskerıler oq atýy kezinde qylmystyq quqyqbuzýshylyqqa barǵan bolýy múmkin dep kúdiktenedi.
Bul rette rezonans týdyrǵan taǵy da basqa úsh jaǵdaı boıynsha qylmystyq tergeý júrgizilmeıtin boldy. Olardyń ishinde 2024 jyly sáýirde ızraıl soqqysynan World Central Kitchen gýmanıtarlyq uıymynyń 7 qyzmetkeriniń, 2024 jyly aqpan aıy men 2023 jyly qarashada «Shekarasyz dárigerler» uıymynyń 4 qyzmetkeriniń qaza bolýyna qatysty ister bar.
Máselen World Central Kitchen oqıǵasynda Izraıldiń áskerıleri avtokólikte bolǵan adamdardy HAMAS jaýyngerlerimen shatastyrǵan. Bul qyzmettik tekserý kezinde anyqtaldy.
Alaıda Izraıldiń áskerı prokýratýrasy ol kezde komandırlerdiń qolynda tıisti aqparat bolmaǵan degen qorytyndyǵa keldi. Sondyqtan bul qylmystyq is qozǵaýǵa jetkiliksiz. Bul oqıǵadan keıin birneshe ofıtser qyzmetinen bosatyldy nemese tártiptik jaýapkershilikke tartyldy.
TsAHAL-dyń málimeti boıynsha armııa bas shtabynyń bólimshesi Gaza sektoryndaǵy soǵys kezinde bolǵan oqıǵalar boıynsha búginge deıin 150-ge jýyq tekserýdi aıaqtap, ári qaraı sheshim qabyldaý úshin materıaldary áskerı prokýratýraǵa jibergen.
Izraıldiń quqyq qorǵaý uıymdary áskerı qyzmetkerlerdiń palestındikterge qatysty jasaǵan áreketteri boıynsha júrgiziletin qylmystyq tergeýlerdiń aıyp taǵýmen aıaqtalýy sırek kezdesetin jaǵdaı ekenin aıtyp otyr.
TsAHAL uıymy azamattardyń, medıtsına jáne gýmanıtarlyq mıssııa qyzmetkerleriniń qazasyna qatysty keıbir jaǵdaılar boıynsha qosymsha tekserý qajet etilse tergeý júrgizýge daıyn ekenin málimdedi.
Aıta keteıik, Sırııa Izraıldiń Idlıbtegi áskerı áýejaıǵa jasaǵan shabýylyn aıyptady.
