Gaza sektorynda qysqy boran saldarynan keminde 14 adam qaza tapty

ASTANA. KAZINFORM — Sońǵy táýlikte Gaza sektorynda bolǵan qysqy boran saldarynan úıler opyrylyp, kóship kelgen otbasylar panalaǵan shatyrlar sýǵa tolǵan. Sonyń saldarynan keminde 14 adam qaza tapty, dep habarlady jergilikti Azamattyq qorǵanys qyzmeti.

Sınhýa agenttiginiń málimetine súıensek, qaza tapqandardyń ishinde úsh bala sýyqtan qaıtys bolǵan. Basqa qurbandar qatty jańbyr men jeldiń áserinen, ásirese Gaza qalasy men anklavtyń soltústik aımaqtarynda, opyrylǵan úılerdiń astynan tabyldy.

Qutqarýshylar 13 úıdiń tolyq nemese jartylaı opyrylýy týraly habarlamalarǵa dereý áreket jasap, 52 adamdy qaýipsiz jerge evakýatsııalady. Qutqarý-qaıta qalpyna keltirý jumystary áli jalǵasyp jatyr, óıtkeni anklavtyń túkpir-túkpirinde 15-ten astam úı zaqymdanǵan.

Gaza densaýlyq saqtaý organdary borannan qaza tapqandar sanynyń áli de artýy múmkin ekenin eskertti.

Aıta keteıik, 2024 jylǵy shildeden 2025 jylǵy 28 qarashaǵa deıin Gaza sektorynda shamamen 1092 naýqas medıtsınalyq evakýatsııany kúte almaı qaıtys boldy.