Gaza sektorynda qaza tapqandar sany 50 886 adamǵa jetti
ASTANA. KAZINFORM – 18 naýryzdan beri Izraıldiń Gazaǵa jasaǵan shabýyldarynan 1522 adamnyń ómiri qıyldy, dep jazdy Anadoly.
2023 jyldyń 7 qazanynan beri Izraıldiń Gaza sektoryna jasaǵan shabýyldarynda qaza tapqan palestınalyqtardyń sany 40-qa artyp, 50 886-ǵa jetti, dep habarlady Gaza sektoryndaǵy Palestına Densaýlyq saqtaý mınıstrligi. Bul eksklavtaǵy Izraıl shabýyldarynda qaza bolǵandar men jaralanǵandar týraly jańarǵan málimet.
Sońǵy 24 saǵatta qaza tapqan 40 palestınalyqtyń máıiti men 146 jaraly jan aımaqtaǵy aýrýhanalarǵa jetkizilgeni habarlandy. Izraıl armııasynyń 19 qańtarda kúshine engen atysty toqtatý jónindegi kelisimi buzylǵaly jasalǵan shabýyl kesirinen qaza tapqandar sany 1522-ge, al jaralanǵandar sany 3834-ke jetti.
2023 jyldyń 7 qazanynan beri Izraıldiń Gaza sektoryna jasaǵan shabýyldarynda qaza tapqan palestınalyqtardyń jalpy sany 50 886-ǵa, jaralanǵandar sany 115 875-ke jetti. Marqumdardyń denesi áli kúnge deıin qıraǵan ǵımarattardyń qırandylary men joldarda qalǵany aıtyldy.
Gazanyń densaýlyq saqtaý mınıstrligi dári-dármek qoryn shuǵyl tolyqtyrýǵa shaqyrady
Gaza sektoryndaǵy Palestınanyń densaýlyq saqtaý mınıstrligi Izraıl gýmanıtarlyq kómek, dári-dármek pen medıtsınalyq maqsattaǵy buıymdardy ákelýge tyıym salǵan eksklavtaǵy aýrýhanalar men alǵashqy medıtsınalyq-sanıtarlyq kómek ortalyqtaryndaǵy dári-dármekterdi dereý tolyqtyrýǵa shaqyrdy.
— Gazadaǵy dári-dármek pen medıtsınalyq maqsattaǵy buıymdardyń tapshylyǵy «qaýipti ári buryn-sońdy bolmaǵan deńgeıge jetti, — delingen Densaýlyq saqtaý mınıstrliginiń málimdemesinde.
Palestına bıligi mańyzdy dári-dármekterdiń 37% qoımada joq ekenine jáne tizimdegi medıtsınalyq zattardyń 59% taýsylǵanyna nazar aýdardy.
— Operatsııa bólmeleri, jansaqtaý bólimderi men jedel járdem qyzmeti dári-dármek pen medıtsınalyq maqsattaǵy buıymdardyń tapshylyǵyna qaramastan jumysyn qamtamasyz etýge tyrysyp jatyr, — dep habarlady Densaýlyq saqtaý mınıstrligi.
Bastapqy medıtsınalyq-sanıtarlyq kómek kórsetý ortalyqtarynda 80 myń qant dıabetimen aýyratyndar, 110 myń gıpertonııalyq naýqastar dári-dármeksiz qalyp otyr.
— Onkologııalyq sondaı-aq qan aýrýlaryn emdeýge arnalǵan dári-dármektiń 54 paıyzy budan bylaı qoljetimsiz bolyp tur, — dep jazady basylym.
Palestına bıligi de Izraıldiń Gaza sektoryna dári-dármek pen gýmanıtarlyq kómektiń kirýine kedergi jasap jatqanyna nazar aýdardy. Shekara qaqpalarynyń jabylýy densaýlyq saqtaý salasyndaǵy daǵdarysty odan ári ýshyqtyrady, delingen habarlamada.
Gazadaǵy naýqastar men jaralylarǵa medıtsınalyq kómek kórsetýde máselesinde de qıyndyqtar baıqalyp otyr.
Eske sala keteıik, buǵan deıin Tramp Netanıahýmen kezdesýde Gaza sektoryn baqylaýǵa alý ıdeıasyn taǵy da alǵa tartqanyn jazǵan bolatynbyz.