Gaza sektorynda qalyp qoıǵan qazaqstandyqtar anyqtaldy
Izraıldegi Qazaqstannyń elshiligine 100-den astam elimizdiń azamaty járdem kórsetý týraly ótinish jasady. Sonymen qatar, Gaza sektorynan taǵy 100-den astam adamdy Qazaqstanǵa jetkizý máselesi pysyqtalyp jatyr. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy Kazinform.
«Izraıl men Palestınadaǵy áskerı-saıası jaǵdaıdyń kúrt ózgerýine baılanysty Qazaqstan Syrtqy ister mınıstrligi elimizdiń azamattaryn qaqtyǵys aımaǵynan shyǵarý boıynsha shara qabyldap jatyr. Bul máseleni sheshý úshin Qazaqstannyń Izraıldegi, Mysyrdaǵy jáne Iordanııadaǵy elshilikteri jumyldyrylǵan. Bıylǵy 16 qazandaǵy jaǵdaı boıynsha Izraıldegi Qazaqstannyń elshiligine 100-den astam elimizdiń azamaty járdem kórsetý týraly ótinish jasady. Olardyń bir bóligi qazaqstandyq dıplomattardyń kómegimen atalǵan elden ketip qaldy», - dedi A. Smadııarov aptalyq brıfıngide.
Onyń aıtýynsha, 15 qazanda elshilik kómegimen Qazaqstannyń 19 azamaty, sonyń arasynda arnaıy baǵdarlamalar boıynsha oqyp júrgen 15 bala elimizge jetkizildi.
«Azamattarymyzdyń qaýipsiz kelýin qamtamasyz etý maqsatynda dıplomattar balalardy Izraıldiń túrli aımaqtarynan áýejaıǵa deıin tikeleı jetkizýin júzege asyrdy. Izraıldegi Qazaqstannyń elshiligi otandastyrymyzdyń elge jetýi jáne áýe bıletterin satyp alý máselesi boıynsha úılestirý jumystaryn jalǵastyryp jatyr. Aıta keteıik, Tel-Avıv qalasynyń halyqaralyq áýejaıy shtatty rejımde qyzmet kórsetip otyr», - dedi resmı ókil.
Sonymen qatar ol Gaza sektoryndaǵy jaǵdaı óte kúrdeli ekenin aıtty.
«Qazaqstannyń Mysyr men Iordanııadaǵy elshilikteri osy aýdandaǵy azamattarymyzben baılanysta otyr. Kúndelikti negizde jergilikti bılikpen otandastyrymyzdy jáne olardyń otbasy múshelerin Gaza sektorynan Mysyrǵa Rafah ótkizý beketi arqyly shyǵýy boıynsha kelissózder jasalyp jatyr. Qolda bar aqparatqa sáıkes, Qazaqstannyń 67 azamaty jáne olardyń otbasy múshelerin qosa eseptegende, 100-den astam adam anyqtaldy. Qazaqstannan basqa taǵy 45 el elshiligi osyndaı kelissóz júrgizip jatyr. Qazaqstan Respýblıkasy azamattary arasynda qaza tapqandar men jaralanǵandar týraly málimetter tirkelmedi», - dedi A. Smadııarov.
Onyń sózine qaraǵanda, Gaza sektoryndaǵy atalǵan 67 adamda qujattary bar degen aqparat taraǵan. Al olardyń bala-shaǵasynda eshbir qujat joq.
«Keıbir balalarda Qazaqstanda alǵan týý týraly kýáligi bar kórinedi. Biraq osy qujattar boıynsha naqty tekserý kerek», - dedi resmı ókil.
