Gaza sektorynda Izraıl shabýylynan 49 adam mert boldy
ASTANA. KAZINFORM – Gaza sektorynyń túrli aýdandarynda tań atqaly júrip jatqan Izraıl shabýyldarynyń saldarynan 49 palestınalyq mert boldy, olardyń tórteýi bala, dep habarlaıdy Anadoly.
Gaza qalasynyń soltústiktegi palestınalyq eksklavyna áýeden jáne artılerııadan jappaı oq jaýdyrylyp jatyr. Aman qalǵan ǵımarattar jarylǵysh zattar men robottardyń kómegimen jermen-jeksen etilgen.
Gaza sektorynda Izraıl armııasynyń artıllerııalyq jáne áýe soqqylarynyń kúsheıýine baılanysty jaǵdaı asa kúrdeli jáne qaýipti kúıinde qaldy.
Batys Rımal aýdanynda palestınalyq otbasy turyp jatqan shatyrǵa jasalǵan shabýyl saldarynan 9 adam qaza tapty, onyń ishinde 3 bala bar.
Qalanyń soltústik bóliginde eki turǵyn úıge baǵyttalǵan soqqylar 10 adamnyń ómirin qıdy, jaralanǵandar da bar.
Djela kóshesinde júrgizilgen ushqyshsyz apparattyń (dronnyń) soqqysynan bir palestınalyq qaza taýyp, birneshe adam jaraqat aldy.
Kerame aýdanynyń soltústik-batys bóliginde adamdar jınalǵan orynǵa jasalǵan shabýyldan 5 adam qaza taýyp, kóptegen adam jaralandy.
Deredj aýdanynyń soltústik-shyǵysynda turǵyn úıge baǵyttalǵan soqqy saldarynan 1 adam qaza taýyp, 4 adam jaralanǵan.
Qalanyń ońtústik bóliginde, Zeıtýn aýdanynda, sondaı-aq Sheıh-Rydvan sý qoımasy mańynda ǵımarattar jarylǵysh zattarmen jabdyqtalǵan áskerı tehnıka men robottardyń kómegimen joıyldy. Sonymen qatar, Izraıldiń bronetehnıkasy Gazanyń ońtústiginde ishinara alǵa jyljyǵany habarlandy.
Gaza sektorynyń ortalyǵyndaǵy shabýyldar
Mýgraka eldi mekeninde otyn jınap júrgen palestınalyq dron soqqysynan adam mert boldy.
Nýseırat bosqyndar lageriniń soltústik jáne ortalyq aýdandaryna artıllerııadan oq jaýdyryldy.
Gaza sektorynyń ońtústigindegi shabýyldar
Izraıl kúshteri soltústik turǵyndaryn ońtústikke kóshýge májbúrlep otyrǵanymen, ońtústik óńirde de shabýyldar bolyp jatyr.
Han-ıÝnýs qalasyna jaqyn ornalasqan Al-Mavası aýdanynda Izraıl áskeriniń oǵynan 3 palestınalyq qaza tapty, olardyń ishinde múgedek áıel bar. Taǵy 4 adam jaralanǵan.
Imara Djasır aýdanynda beıbit turǵyndar jınalǵan jerge jasalǵan shabýyldan 1 adam qaza taýyp, 4 adam jaraqat aldy.
Han-ıÝnýstyń shyǵys bóliginde, gýmanıtarlyq kómek kútip turǵan turǵyndarǵa jasalǵan shabýyldan 4 palestınalyq qaza tapty, jaralanǵandar bar.
Kúndizgi shabýyldardyń qarqyny artty. Nýseırat lagerinde azamattar turǵan shatyrǵa tikeleı soqqy jasalyp, 4 adam qaza boldy. Gazanyń ońtústigindegi Sabra aýdanynda beıbit turǵyndar tobyna baǵyttalǵan soqqydan 5 adam mert boldy.
Qaza tapqandar arasynda BAQ qyzmetkeri bar
Nasr aýdanynda, úı mańyndaǵy shatyrǵa baǵyttalǵan soqqy saldarynan 2 adam qaza tapty, olardyń biri — jýrnalıst Muhammed ál-Kývaıfı.
Týffah aýdanynda HAMAS jetekshileriniń biri — Rýhı Mýshtahıdiń 7 jasar qyzy Sýltana Mýshtaha qaza tapty. Osy aýdandaǵy taǵy bir shabýyl kezinde taǵy bir palestınalyq kóz jumdy.
Osyǵan deıin Izraıl Gaza qalasyna shabýylǵa shyqqany týraly jazdyq.