Gaza sektorynda gýmanıtarlyq júk kóligi aýdarylyp, 20 adam mert boldy
ASTANA. KAZINFORM – Gaza bıligi Izraıldi ádeıi haos týdyryp, sektordy qylmystyq jolmen blokadaǵa aınaldyryp otyr, dep aıyptady.
Gaza sektorynda azyq-túlik taratatyn gýmanıtarlyq júk kóligi aýdarylyp, 20 palestındik qaza tapty. Oqıǵa áli kúnge deıin jalǵasyp kele jatqan gýmanıtarlyq blokada jaǵdaıynda boldy.
Gaza úkimetiniń Medıaofısi taratqan málimdemede Izraıl armııasy gýmanıtarlyq kómektiń jetkizilýin áli de shektep, aımaqtaǵy gýmanıtarlyq daǵdarysty ýshyqtyryp otyrǵany aıtylǵan. Atap aıtqanda, Izraıl ashtyqtan zardap shekken aýdandarǵa sanaýly ǵana kólik jibere otyryp, olardyń ómirine qaýip tóndirip otyrǵany habarlanǵan.
«Izraıl okkýpatsııasy men ádeıi uıymdastyrylǵan tártipsizdik saldarynan Deır el-Balah aýdanynda gýmanıtarlyq kólik buryn bombalanǵan, júrip ótýge jaramsyz jolǵa baǵyttalǵan. Kólik tamaq alýǵa umtylǵan palestındikterdiń ústine aýdarylyp, 20 adam mert boldy, ondaǵan adam jaraqat aldy», — delingen málimdemede.
Gaza sektorynyń bıligi Izraıldi asharshylyqty ádeıi uıymdastyrdy dep aıyptap otyr jáne bul árekettiń saldarynan 2,4 mıllıon adamnyń ómirine qaýip tóngen. Sondaı-aq Gaza bıliginiń pikirinshe, Izraıl tarapy azyq-túlik, dári-dármek pen alǵashqy qajetti zattardyń jetkizilýine kedergi keltirip otyr.
Málimdemede halyqaralyq qaýymdastyqtyń gýmanıtarlyq apatty kóre tura, únsiz otyrǵany, aıýandyq áreketterdiń shekten shyqqany erekshe aıtylady.
Gaza bıligi Birikken Ulttar Uıymyn jáne halyqaralyq quqyq qorǵaý uıymdaryn Izraıldiń áreketterin toqtatý, gýmanıtarlyq kómektiń kedergisiz jetkizilýin qamtamasyz etý, sondaı-aq shekaranyń turaqty ashyq bolýy úshin dereý shara qoldanýǵa shaqyrdy.
«Bolyp jatqan jaǵdaıǵa beıjaı qaraý, únsiz qalý nemese elemeý — bul Izraıldiń Gaza sektorynda jasap jatqan qylmystaryna tikeleı nemese janama qatysý degen sóz», — dedi jergilikti bılik ókilderi.
Aıta keteıik, osyǵan deıin BUU Izraıl blokadasy Gazany jer betindegi eń ash aımaqqa aınaldyrǵanyn aıtqan bolatyn.