Gaza sektorynda bitim jarııalanǵannan keıin 87 palestınalyq qaza tapty

ASTANA. KAZINFORM — Gaza sektorynda atysty toqtatý rejımi kúshine engen sátten bastap keminde 87 palestındik qaza tapty, dep habarlaıdy Kazinform agenttigi TASS-qa silteme jasap.

Palestınalyq anklavtyń Densaýlyq saqtaý mınıstrliginiń derekteri boıynsha, bitim týraly kelisim kúshine engen sátten beri 311 adam ártúrli deńgeıdegi jaraqat alǵan.

Sońǵy táýlikte ǵana medıtsınalyq mekemelerge 13 adamnyń máıiti jetkizilgen. Olardyń jeteýi – Izraıl áýe soqqylarynyń saldarynan qaza tapqan, al qalǵan altaýy – qıraǵan ǵımarattardyń úıindileriniń astynan tabylǵan.

Palestınalyq taraptyń málimetinshe, 2023 jyldyń 7 qazanynan bastap jalpy qaza tapqandar sany 68 229 adamǵa jetip, jaralanǵandar sany 170 myńnan asqan.

Sonymen qatar Izraıl tarapy palestınalyqtarǵa 15 adamnyń denesin qaıtaryp berdi. Jalpy, Halyqaralyq Qyzyl Krest komıtetiniń aralasýymen qol jetkizilgen kelisim aıasynda 165 adamnyń máıiti qaıtarylǵan.

6 qazanda Izraıl men HAMAS delegatsııalary Egıpet, Katar, AQSh jáne Túrkııa ókilderiniń deldaldyǵymen janjaldy retteý boıynsha janama kelissózderdi qaıta bastaǵan edi.

Al 9 qazanda taraptar AQSh-tyń burynǵy prezıdenti Donald Tramp usynǵan beıbit jospardyń alǵashqy kezeńin júzege asyrý jónindegi kelisimge qol qoıdy. Bitim rejımi 10 qazanda kúshine endi.

Eske sala ketsek, Izraıldiń shabýylynan Gazada bir kúnde 40-tan astam palestınalyq qaza tapqanyn jazǵanbyz.

Al keshe AQSh vıtse-prezıdenti Djeı Dı Vens Gaza sektoryndaǵy bitimdi qoldaý úshin Izraılge bardy.