Gaza sektorynda azyq-túlik baǵasy 527 paıyzǵa ósti

ASTANA. KAZINFORM – Gazanyń saýda-ónerkásip palatasy Izraıl blokadasynyń saldarynan ekonomıka sektory qulap, azyq-túlik baǵasy 527 paıyzǵa óskenin málim etti, dep jazady Anadoly.

Izraıl taýarlardyń kirýine jol bermeı otyr, óz kezeginde ol saýdany shektep, baǵanyń kúrt ósýine yqpal etti. Palata Izraıldi ashtyqty qarý retinde paıdalandy jáne halyqaralyq quqyqty buzdy dep aıyptady.

2023 jyldyń 7 qazanyndaǵy shabýyldan keıin Gazada 52 24 adam mert bolǵan. Atysty toqtatý týraly rejımniń ýaqyty ótken soń, ıaǵnı 18 naýryzdan bastap, Izraıl shabýyldardy qaıta bastady. Osy ýaqyt aralyǵynda 2025 palestınalyq mert boldy. Olardyń basym bóligi áıelder men qarttar, 5 myńnan astam adam jaraqat aldy. Kúnine onda ortasha alǵanda 90 adam mert bolady.

Qatar premer-mınıstri Muhammed bın Abdýrrahman Ál Sanı ashtyqty qarý retinde paıdalaný áreketin aıyptap, Gazaǵa gýmanıtarlyq kómek jetkizý úshin Izraılge qysym jasaýǵa shaqyrdy.

Ol Qatardyń Mysyrmen birge soǵysty toqtatyp, kepilge alynǵandardy bosatý baǵytynda jumys istep jatqanyn atap ótti.

Ál Sanı sonymen qatar Qatardyń Sırııany qalpyna keltirýdi qoldaıtynyn jáne ol eldiń táýelsizdigine qaýip tóndiretin áreketterge qarsy ekenin málimdedi, Sırııaǵa qarsy sanktsııany alyp tastaýǵa shaqyrdy.

HAMAS pen Izraıl arasyndaǵy kelissózder Qatar men Mysyrdyń deldaldyǵymen jalǵasyp jatyr. Ál Sanı Qatardyń AQSh-taǵy stýdentterdiń narazylyqtaryna qatysy bar degen aıypty moıyndamady. Ol eldiń barynsha ashyq áreket etetinin jetkizdi.

Osyǵan deıin HAMAS kepilge alynǵandardy bosatyp, bes jylǵa tatýlasýǵa daıyn ekendigin málimdegeni týraly jazdyq.