«Gaza sektorynda atysty toqtatýǵa tyrysamyn»: Tramp Palestına basshysyna sóz berdi

ASTANA. KAZINFORM — AQSh-tyń jańadan saılanǵan prezıdenti Donald Tramp juma kúni Palestına ulttyq ákimshilik basshysy Mahmýd Abbaspen telefon arqyly sóılesip, Gaza sektorynda atysty toqtatý jumystaryna atsalysatynyn aıtty. Bul olardyń 2017 jyldan bergi alǵashqy tildesýi, dep habarlaıdy Kazinform Axios-qa silteme jasap. 

Donald Tramp pen Mahmýd Abbas AQSh prezıdenti Ierýsalım qalasyn Izraıl astanasy dep tanıtynyn jarııalap, onda Amerıka elshiligin ornalastyrǵannan soń sóılespegen. Bul tildesý Palestına basshylyǵy Tramppen qarym-qatynastyń jańa kezeńin bastaýǵa daıyn ekendigin bildiretin belgi boldy. 

Ótken jyldyń shildesinde Tramp Abbastan kelgen hatty jarııalady. Onda Palestına basshysy Taıaý Shyǵystaǵy ahýalǵa baılanysty alańdaýshylyq tanytatynyn aıtyp, óńirde beıbitshilikti saqtaý úshin baryn salatynyn aıtqan. 

«Abbas Trampty jańa merzimge prezıdenttik laýazymǵa saılanýymen quttyqtap, oǵan qyzmetinde sáttilik tiledi. Ol, sondaı-aq, Tramppen birge halyqaralyq legıtımdilik pen qaǵıdattarǵa negizdelgen ádiletti ári keń qamtymdy álem qalyptastyrý baǵytynda jumys isteýge ázir ekenin jetkizdi» delingen Palestına basshylyǵynyń habarlamasynda.

— Óz kezeginde Tramp soǵystyń toqtaýyn qalaıtynyn, ol úshin prezıdent Abbaspen de, ózge óńirlik ári jahandyq múddeli taraptarmen de aımaqta beıbitshilik ornaýy úshin birlese jumys isteýge daıyn ekenin bildirdi, — dep habarlaıdy Palestına prezıdenttiginiń ókilderi.

Aıta keteıik, buǵan deıin sarapshylar Tramptyń jeńisi men munaı baǵasynyń qubylýy teńgege qalaı áser etetinin aıtyp berdi.