Gaza sektorynda ashtyqtan taǵy 5 adam kóz jumdy

ASTANA. KAZINFORM — Sońǵy 24 saǵat ishinde ashtyq pen toıyp tamaq ishpeýdiń saldarynan taǵy bes palestınalyq qaıtys boldy, olardyń ekeýi — bala. Bul týraly Gaza sektoryndaǵy Densaýlyq saqtaý mınıstrliginiń bas dırektory Mýnır ál-Býrsh málimdedi, dep jazady Anadoly.

Osylaısha, Gazada ashtyqtan qaza tapqandardyń jalpy sany 217 adamǵa jetti, onyń ishinde 100-i bala.

Aıta keteıik, Izraıldiń qatań blokadasy men úzdiksiz shabýyldary azamattyq ınfraqurylymǵa orasan zor zııan keltirip jatyr — Gaza aýmaǵynyń shamamen 88%-y qıraǵan. Izraıl áskeri kún saıyn áýe soqqylaryn jasap, evakýatsııa týraly buıryqtar shyǵaryp jatyr. Sonyń saldarynan shamamen eki mıllıon adam óz úılerin tastap ketýge májbúr boldy, olardyń kóbi birneshe ret kóship-qonýǵa májbúr bolǵan.

Azamattar ýaqytsha tigilgen shatyrlardy panalaǵan. Olar tyǵyz ornalasqan, antısanıtarııalyq jerlerde ómir súrip keledi. Gıgıena quraldarynyń jetispeýshiligi juqpaly aýrýlardyń taralýyna sebep bolyp otyr.

Jergilikti jáne halyqaralyq uıymdar Izraıldi ashtyq pen aýyz sýdyń tapshylyǵyn soǵys qarýy retinde paıdalanyp otyr dep aıyptaıdy. Izraıl áskeri kóship-qonǵan adamdarǵa arnalǵan lagerlerge jáne basqa da beıbit nysandarǵa soqqy berýdi jalǵastyryp keledi. Bul nysandarda palestınalyqtar bas saýǵalap júrgen bolatyn.

Budan buryn Gazada áýeden tastalǵan gýmanıtarlyq júk jáshiginiń qulaýynan 14 jastaǵy jasóspirim qaza tapqanyn habarlaǵan edik.