Gaza sektorynda ashtyqtan kóz jumǵandar sany 169-ǵa jetti
Palestınanyń Gaza sektorynda ashtyq saldarynan kóz jumǵandar sany 169 adamǵa jetti, onyń ishinde 93-i — balalar, dep habarlaıdy TASS.
Bul týraly anklavtyń Densaýlyq saqtaý mınıstrligi óziniń Telegram-arnasynda habarlady.
— Sońǵy 24 saǵat ishinde Gazadaǵy aýrýhanalarda ashtyq pen toıyp tamaqtanbaý saldarynan jeti jańa ólim jaǵdaıy tirkeldi, — delingen vedomstvo habarlamasynda.
Osylaısha ashtyqtan kóz jumǵandar sany jalpy 169 adam boldy, onyń 93-i kámeletke tolmaǵandar. Buǵan deıin 30 shildede HAMAS qozǵalysy ashtyqtan 154 adam qaza tapqanyn habarlaǵan edi.
Mınıstrliktiń sońǵy derekteri boıynsha, 2023 jylǵy qazan aıynan beri Gazadaǵy qaqtyǵystar kezinde kóz jumǵandar sany 60 430 adamǵa jetken. 148 myńnan astam adam jaraqat alǵan.
2025 jylǵy 2 naýryzdan bastap Izraıl sheshimimen Gaza sektoryna halyqaralyq gýmanıtarlyq kómek tolyqtaı toqtatyldy. Barlyq baqylaý-ótkizý beketi jabyq kúıinde qalyp otyr. Qazir azyq-túlik taratý jumystary Izraıl men AQSh-tyń baqylaýyndaǵy Gazaǵa gýmanıtarlyq kómek qory arqyly júrgizilip jatyr.
2025 jyldyń naýryzynda Izraıl armııasy Gazadaǵy áskerı operatsııalaryn qaıta jandandyrdy. Bul qańtarda jarııalanǵan atysty toqtatý rejımin buzdy. Qatar, Mysyr jáne AQSh araǵaıyndyǵymen júrgizilgen birneshe kelissóz raýndtarynda taraptar jańa bitim sharttary boıynsha mámilege kele almady.
Aıta ketelik Gaza sektoryna bes elden gýmanıtarlyq kómek jetkizilgeni týraly jazǵan edik.