Gaza sektorynda ashtyqtan qaıtys bolǵandar sany 127 adamǵa jetti
ASTANA. KAZINFORM - Izraıldiń qatań qorshaýyndaǵy Gaza sektorynda sońǵy táýlikte bes palestınalyq, onyń ishinde eki bala ashtyqtan qaıtys boldy, dep habarlaıdy Anadolu.
— Gazadaǵy balalar ashtyqtan ólip jatyr, - dedi Palestına Densaýlyq saqtaý mınıstrliginiń bas dırektory Mýnır al-Bersh H áleýmettik jelisindegi paraqshasynda.
Ol asharshylyq qurbandarynyń jalpy sany 127-ge jetkenin jáne onyń 85-i balalar ekenin atap ótti. Vedomstvo ókili bul sandar Gazadaǵy gýmanıtarlyq apattyń naqty aýqymyn kórsetetinine nazar aýdardy.
— Balalardyń ómir súrý quqyǵy únsiz alynyp jatyr, - dedi Al-Bersh.
Ol sondaı-aq Izraıldi gýmanıtarlyq kómek jetkizýge tosqaýyl qoıdy dep aıyptady. Onyń aıtýynsha, shekara beketterinde azyq-túlik jetkizilimi toqtap, halyqaralyq qaýymdastyq «uıatsyz únsizdikti» saqtap otyr.
Al-Bersh «baıaý ólimdi» toqtatýǵa jáne Gazadaǵy adamdardy qutqarý úshin shekaralyq ótkelderdi ashýǵa shaqyrdy.
Izraıldiń qatań qorshaýynda jáne úzdiksiz shabýyldar astynda turǵan Gaza sektory aýyr gýmanıtarlyq daǵdarysty bastan keshirip jatyr. Ashtyq kúsheıgen, sý, dári-dármek, medıtsınalyq jáne gıgıenalyq quraldar tapshy.
Balalar men beıbit turǵyndar arasynda qaza bolǵandar sany artyp, jergilikti jáne halyqaralyq uıymdar Izraıldi ashtyq pen sý tapshylyǵyn qarý retinde paıdalandy dep aıyptap jatyr.
Shabýyldardyń, azamattyq ınfraqurylymnyń buzylýynyń jáne 2,3 mıllıon turǵynnan 2 mıllıonnan astam turǵyndy kóshirý týraly buıryqtardyń nátıjesinde adamdar baspanasyz qaldy. Olardyń kópshiligi gıgıenasy nashar jáne juqpaly aýrý taralý qaýpi bar ýaqytsha baspanalarda turyp jatyr.
Izraıldiń kúndelikti áýe shabýyldary bosqyndar lagerleri men azamattyq nysandardy buzyp jatyr, bul beıbit turǵyndardyń qaıǵy-qasiretin kúsheıtedi.
2023 jyldyń 7 qazanynan bastap Izraıl armııasynyń Gazaǵa jasaǵan shabýyldarynan kem degende 59 676 palestınalyq kóz jumdy, 143 965-ten astamy jaraqat aldy.
Aıta keteıik, Izraıl Gaza sektoryna azyq-túlikti parashıýtpen tastaýǵa ruqsat bermek.