Gaza sektorynan Mysyr aýmaǵyna 92 Qazaqstan azamaty men olardyń otbasy músheleri ótti - SІM
Búgin evakýatsııanyń birinshi kezeńi júzege asyrylyp, nátıjesinde «Rafah» baqylaý-ótkizý pýnkti arqyly Gaza sektorynan Mysyr aýmaǵyna 92 Qazaqstan azamaty men olardyń otbasy músheleri ótti.
Bul týraly Kazinform QR Syrtqy ister mınıstrliginiń baspasóz qyzmetine silteme jasap habarlaıdy.
«Qazaqstandyq dıplomattar otandastarymyzǵa barlyq qajetti konsýldyq-quqyqtyq jáne psıhologııalyq kómek kórsetti. Shekaradaǵy rásimderden keıin bizdiń azamattarymyz kolonna quramynda jolǵa shyqty jáne jaqyn arada Kaır qalasyna jetedi»,-delingen habarlamada.
Aıta ketetin jáıt, QR azamattaryn Gaza sektorynan evakýatsııalaý kezeń-kezeńmen júrgizilýde. Osy oraıda qazaqstandyq dıplomattar Izraıl, Mysyr, Palestına ulttyq ákimshiliginiń quzyretti organdarymen jáne basqa da halyqaralyq uıymdarmen qalǵan otandastarymyzdy anklavtan evakýatsııalaý boıynsha jumysty jalǵastyrady.
Qazaqstandyqtar Gaza sektorynan Kaırge aman-esen jetkizilgennen keıin QR Úkimeti olardy elge jetkizý úshin evakýatsııalyq bort joldaıdy.
