Gaza sektorynan evakýatsııalanǵan otandastarymyz Kaırge jetip, qonaq úıge jaıǵasty
Búgin Gaza sektorynan evakýatsııalanǵan otandastarymyz Kaırge jetip, qonaq úıge jaıǵasty, dep habarlaıdy Kazinform Syrtqy ister mınıstrligine silteme jasap.
Qazaqstandyq dıplomattar men halyqaralyq uıymdardyń qyzmetkerleri olarǵa barlyq qajetti kómekti, onyń ishinde psıhologııalyq qoldaý kórsetýde.
Sonymen qatar QR azamattary men olardyń otbasy múshelerine qujat rásimdeý máseleleri qaralý ústinde.
Eske sala keteıik, Gaza sektorynan Mysyr aýmaǵyna 92 Qazaqstan azamaty men olardyń otbasy músheleri ótkenin habarlaǵan bolatynbyz.
Aıta ketetin jáıt, QR azamattaryn Gaza sektorynan evakýatsııalaý kezeń-kezeńmen júrgizilip jatyr.
Osy oraıda qazaqstandyq dıplomattar Izraıl, Mysyr, Palestına ulttyq ákimshiliginiń quzyretti organdarymen jáne basqa da halyqaralyq uıymdarmen qalǵan otandastarymyzdy anklavtan evakýatsııalaý boıynsha jumysty jalǵastyrady.
Qazaqstandyqtardy elge jetkizý úshin Úkimet evakýatsııalyq bort joldaıdy.
