Gaza sektorynan evakýatsııalanǵan Qazaqstan azamattary qaıda ornalastyryldy
Gaza sektorynan evakýatsııalanǵan otandastarymyz Qazaqstanǵa jetkizilgennen keıin qaıda ornalastyrylǵany belgili boldy, dep habarlaıdy Kazinform.
Premer-Mınıstr Álıhan Smaıylov Senat depýtattarynyń saýalyna bergen jaýabynda elimizdiń Syrtqy ister mınıstrligi tótenshe jaǵdaı týyndaǵan jaǵdaıda shet elde júrgen otandastarymyzdy jedel aqparattandyrý, qajetti kómek kórsetý jáne evakýatsııalaý boıynsha jedel áreket jasap, belsendi sharalar qabyldaıtyndyǵyn aıtady.
«Búginde Palestınadan Mysyrǵa «Rafah» baqylaý-ótkizý beketi arqyly Qazaqstan Respýblıkasynyń 99 azamaty men olardyń otbasy músheleri, onyń ishinde 44 bala evakýatsııalandy. Evakýatsııalanǵan azamattar Qazaqstanǵa jetkizilgennen keıin Almaty qalasyndaǵy «Pana» arnaýly beıimdeý ortalyǵyna ornalastyryldy. Olarmen munan arǵy jumysty jergilikti atqarýshy organdar júrgizedi», – dep atap ótedi Úkimet basshysy jaýabynda.
Buǵan deıin Qasym-Jomart Toqaevtyń tapsyrmasyna sáıkes QR Syrtqy ister mınıstrligi Gaza sektoryndaǵy qazaqstandyqtardy evakýatsııalap, 17 qarashada Almatyǵa jetkizgenin jazǵan edik.
Osydan keıin Syrtqy ister mınıstriniń birinshi orynbasary Qaırat Omarov Palestınanyń Gaza sektorynan evakýatsııalanǵan otandastarymyzdyń bala-shaǵasyna qandaı mártebe beriletinin aıtqan bolatyn.
