Gaza sektorynan evakýatsııalanǵan áıel: Bizdi qutqarǵan – Qazaqstan
ASTANA. KAZINFORM — Qazaqstandyq dıplomattar Gaza sektorynan palestınalyq dáriger, «Kamal Advan» aýrýhanasynyń dırektory Hýsam Abý Safııanyń otbasyn sátti evakýatsııalady.
Evakýatsııalanǵandar qatarynda Hýsamnyń zaıyby Albına Abý Safııa men bes balasy bar. Barlyǵy – Qazaqstan azamattary. Otbasy Gaza sektorynan qurlyq arqyly Iordanııaǵa jetkizildi.
Evakýatsııa operatsııasy Qazaqstannyń Iordanııadaǵy Elshiligi tarapynan, Izraıldegi Elshiliktiń jáne Iordanııa men Izraıl bıliginiń qoldaýymen úılestirildi.
8 tamyz kúni evakýatsııalanǵan otbasy Amman qalasyndaǵy Álııa patshaıym atyndaǵy halyqaralyq áýejaıǵa kelip jetti. Osy jerden olar Qazaqstanǵa attandy. Evakýatsııa aımaqtaǵy shıelenisken jaǵdaı men kúrdeli gýmanıtarlyq ahýalǵa qaramastan, QR dıplomatııalyq jáne konsýldyq qyzmetteriniń úılesimdi jumysynyń, sondaı-aq ıordandyq jáne ızraıldik taraptardyń qoldaýynyń arqasynda sátti júzege asty.
«Qazaqstannyń Amman men Tel-Avıvtegi elshilikteri óńirdegi jaǵdaıdy muqııat baqylap otyr jáne Gaza sektory men jalpy Palestına aýmaǵynda júrgen qazaqstandyqtarmen turaqty baılanys ornatqan», – delingen QR Syrtqy ister mınıstrliginiń habarlamasynda.
Mınıstrlik Iordanııa men Izraıl bıligine, sondaı-aq Halyqaralyq Qyzyl Krest komıtetine kórsetken jedel kómegi men tıimdi yntymaqtastyǵy úshin shynaıy alǵysyn bildirdi.
Hýsam Abý Safııa – palestınalyq pedıatr jáne neonatolog. Ol Gaza sektoryndaǵy Djabalııa bosqyndar lagerinde dúnıege kelgen. Medıtsına mamandyǵy boıynsha bilimdi Túrkistandaǵy Ahmet ıAsaýı atyndaǵy ýnıversıtette alyp, dál osy oqý ornynda bolashaq jubaıy Albınamen tanysqan. 1996 jyly oqýyn aıaqtaǵan soń erli-zaıyptylar Gaza sektoryna oralyp, alty bala tárbıelegen.
2024 jyldyń aqpanynan bastap Hýsam Beıt-Lahııa qalasyndaǵy «Kamal Advan» aýrýhanasynyń dırektory bolyp jumys istegen. Alaıda sol jyldyń jeltoqsanynda ol Izraıl áskeri tarapynan ustalyp, keıin habarsyz ketken.
Kazinform agenttiginiń tilshisi evakýatsııa kezinde Amman qalasynda Albına Abý Safııamen suhbattasty.
— Albına, evakýatsııadan keıingi kóńil-kúıińiz qandaı? Bul úderis qalaı ótti?
— Biz bul evakýatsııany soǵys bastalǵan sátten bastap uzaq kúttik. 2023 jyly Qazaqstan evakýatsııa usynǵan kezde biz Gaza sektorynyń soltústiginde boldyq, al bul aýmaq tolyǵymen qorshaýda edi. Biz turǵan aýrýhanany Izraıl áskeri qorshaýǵa alyp, odan shyǵa almadyq. Anklavtyń ońtústigine qaraı qozǵalýǵa tyrysý óz ómirimizge qaýip tóndirýmen birdeı boldy.
Shynymdy aıtsam, men basynda ketkim keldi, biraq jaǵdaı múmkindik bermedi. Biz kún saıyn jaqsylyq bolady dep úmittendik, soǵystyń aıaqtalýyn kúttik. Alaıda ýaqyt ótken saıyn jaǵdaı nasharlaı berdi. Biz ár kúndi qorqynyshpen ótkizip júrdik. Ár tańdy sońǵy kúnimiz bolýy múmkin degen oımen qarsy aldyq. Evakýatsııa biz úshin naǵyz úmit sáýlesi boldy. Elshilikten qońyraý shalyp, bizdiń atymyz tizimge engenin aıtqanda, qýanyshymyzda shek bolmady. Bul biz úshin jaryqqa jol ashqan sát boldy.
— Evakýatsııa barysynda qandaı qıyndyqtar boldy? Qazaqstan tarapynan qoldaýdy sezindińiz be?
— Bizdiń atymyz evakýatsııa tizimine engeni týraly habar – naǵyz ǵajaıyp boldy. Gaza sektoryndaǵy jaǵdaı tym qaýipti edi. Bizde eshqandaı úmit qalmaǵandaı-tyn. Biraq Iordanııadaǵy elshilikten (konsýl Rýstam Jumatov – red.) qońyraý shalyp, shyǵý múmkindigi bar ekenin aıtqanda, bul biz úshin qutqarý sekildi boldy. Qazaqstannyń qoldaýy biz úshin asa mańyzdy edi. Bizdi umytpaǵandaryn sezindik.
— Joldasyńyz, doktor Hýsam jeltoqsanda tutqyndaldy. Sol jaıynda ne aıtasyz?
— Iá, ony 2024 jylǵy 27 jeltoqsanda áketti. Biz ol kezde «Kamal Advan» aýrýhanasynda boldyq. Izraıl áskeri ony qorshap aldy. Áıelder men balalar, sondaı-aq júkti áıelder basqa aýrýhanaǵa kóshirildi. Aýrýhananyń barlyq er adamdary, sonyń ishinde kúıeýim de tutqyndaldy. Ol tek jaralylar men aýyr naýqastardyń qaýipsizdigin qamtamasyz etýdi surady. Biraq ony alyp ketti.
Kúıeýim sońyna deıin jumys istedi. Ol jaı ǵana dáriger bolatyn, eshqandaı saıası nemese áskerı uıymǵa qatysy joq. Onyń jalǵyz maqsaty – adamdardyń ómirin saqtaý edi. Ol tek emdeýmen aınalysty.
— Gaza sektoryndaǵy ashtyq pen tapshylyq jaǵdaıynda ómir týraly ne aıtar edińiz?
— Bul óte qorqynyshty kezeń boldy. Biz ashyqtyq. Balalar jıi nan suraıtyn. Tipti, bir úzim nandy armandaıtynbyz. Bul – ómirimizdegi eń aýyr kúnder edi. Tamaq qory tez taýsylyp qaldy, al ónim baǵasy sharyqtap ketti. Mysaly, unnyń bir kelisi 200 shekelge deıin (shamamen 30 myń teńge) qymbattady. Adamdar kún kórý úshin urlyqqa da barýǵa májbúr boldy. Bári qıyn jaǵdaıda ómir súrdi. Biz de barynsha shydaýǵa tyrystyq, basqa amal bolmady.
— Qazaqstanǵa kelgen soń aldaǵy ómirińizdi qalaı elestetesiz?
— Iá, meniń týystarym Túrkistan oblysynda jáne Astanada turady. Biz solarmen birge bolamyz. Bárin qaıta bastaý ońaı emes, biraq biz tyrysamyz. Biz Gazadan eshteńe alyp shyǵa almadyq. Tek 300 dollardan artyq aqsha jáne shaǵyn sómke ǵana ruqsat etildi.
— Qazaqstan halqyna ne aıtqyńyz keledi?
— Bul ómirde eń aýyr eki nárse bar – soǵys pen ashtyq. Men Qazaqstannyń Iordanııa men Izraıldegi elshilikterine kórsetken kómegi úshin shyn júrekten alǵys aıtamyn. Olar bizdi umytpady, qamqorlyq kórsetti. Bizge qaýipsizdik pen úmit syılady. Qazaq halqyna qıyn sátterde bizge qoldaý kórsetkeni úshin erekshe rızashylyǵymdy bildiremin.
Eske sala keteıik, buǵan deıin Gaza sektorynan alty Qazaqstan azamatynyń evakýatsııalanǵany habarlanǵan bolatyn.