Gaza sektoryna jappaı iPhone 17 jetkizilip jatyr
ASTANA.KAZINFORM - Ábden qıraǵan anklavqa sońǵy úlgidegi smartfondardyń jetkizilýi týraly habar turǵyndar arasynda daý týdyrdy, dep habarlaıdy Kazinform agenttiginiń menshikti tilshisi.
Izraıl azyq-túlik, dári-dármek jáne basqa da qajetti zattarǵa birneshe aılyq shekteýlerden keıin Gaza sektoryna on myńdaǵan iPhone 17 smartfondaryn jappaı ákelýge ruqsat berdi. Bul týraly ámirlikterdiń The National basylymy habarlady.
Kóptegen otbasy áli shatyrlardy panalap, azyq-túlik tapshylyǵyna tap bolyp jatqan tusta naryqtaǵy eń qymbat smartfon úlgileriniń jetkizilimi qoǵamdyq rezonans týdyrdy.
Basylymnyń habarlaýynsha, Gazanyń ortalyq bóligindegi Nýseırat lagerinde shamamen 7000 shekel (shamamen 2200 dollar) turatyn smartfondarǵa uzyn-sonar kezek paıda boldy. Dúkenderdiń biriniń ıesi Muhammed Zakýl suranys óte joǵary ekenin aıtty.
- Ár jetkizilimde 10 myńnan astam, keıde odan da kóp telefon bar. Mundaı jetkizilim on shaqty ret boldy, - dedi ol.
Anklav turǵyndary azyq-túlik, dári-dármek jáne qurylys materıaldarynyń tapshylyǵy kezinde joǵary tehnologııalyq qurylǵylardyń qalaı erkin kirip jatqanyna tań qalyp otyr.
Satyp alýshylardyń keıbiri - qoǵamdyq belsendiler, kásipkerler, halyqaralyq uıymdardyń qyzmetkerleri nemese soǵyspen baılanysty qyzmetterden tabys tapqan adamdar.
Deır el-Balah qalasynda eki apaly-sińli Ragad pen Tala azyq-túlik saýdasymen aınalysatyn ákeleri iPhone telefondaryn alyp bergenin aıtty.
Syılyqtardyń quny 4500 dollardan asty.
Jýrnalıst ári zertteýshi Hamza ash-Shobakı smartfondardyń jappaı jetkizilýin alańdatarlyq jaıt dep sanaıdy.
- Izraıl dári-dármek, shatyrlar men azyq-túlik ımportyna tyıym salyp, biraq on myńdaǵan zamanaýı smartfondarǵa ruqsat bergeni qalaı? Bul logıkaǵa syımaıdy, - dep atap ótti ol.
Onyń aıtýynsha, bul saıasat Izraıldiń belsendilerdi, qoǵamdastyq kóshbasshylaryn jáne turǵyndardyń baılanysyn baqylaýdy kúsheıtý saıasatymen baılanysty bolýy múmkin.
Onyń aıtýynsha, Gaza sektoryndaǵy dúken iPhone 17 Pro Max smartfondaryna toly, al negizgi qajetti taýarlar tapshy.
Ash-Shobakı muny baqylaý strategııasynyń bir bóligi retinde qarastyrýǵa bolady dep sanaıdy.
Osyǵan deıin Gazadaǵy gýmanıtarlyq kómek qory jumysyn toqtatqanyn jarııalaǵany týraly jazdyq.