Gaza sektoryna shabýyldan zardap shekken palestınalyqtar Halyqaralyq sotqa shaǵym túsirdi
Izraıldiń Gazaǵa jasaǵan shabýyldarynan zardap shekken palestınalyqtardyń advokattary dúısenbide Gollandııanyń Gaaga qalasyndaǵy Halyqaralyq qylmystyq sotyna (HQS) shaǵym túsirdi.
Kazinform agenttigi bul týraly Anadoly aqparat agenttigine silteme jasap habarlaıdy.
Jábirlenýshilerdiń HQS-taǵy ókili Jıl Devers jáne onymen birge erip kelgen tórt adamnan turatyn delegatsııa sot prokýroryna shaǵym túsirdi.
Belgili bolǵandaı, genotsıd jáne basqa qylmystar boıynsha aıyptaýlar Halyqaralyq qylmystyq sotqa jiberilgeni, atap aıtqanda, bastamany Frantsııadaǵy eń tájirıbeli zańgerlerdiń biri Jıl Devers bastaǵan halyqaralyq zańgerler toby qolǵa alǵany habarlandy.
Devers baspasózge sóılegen sózinde Izraıldiń Gaza sektoryndaǵy áreketteri - genotsıd qylmysynyń faktorlary ekenin aıtty.
«HQS qazirgi kezde tıisti tergeý jumystarynyń bóligi retinde áskerı qylmystardy tergep jatyr. Buǵan genotsıd qylmysy da qosylýy kerek», - dedi ol.
Devers sondaı-aq bir mıllıonnan astam adamdy kóshirýge májbúrleý jáne olardyń sý, energııa, azyq-túlik jáne dári-dármekke degen múmkindigin shekteý Izraıldiń Gazadaǵy halyqtyń tolyq joıylýyn qalaıtynyn kórsetetinin qosyp ótti.
Sondaı-aq baspasózge sóılegen Belgııanyń burynǵy senatory Per Galand Belgııa Syrtqy ister mınıstrligin Palestına memleketin múmkindiginshe tezirek tanýǵa shaqyrdy.
«Biz munda adam quqyqtaryn qorǵaý jáne ádildik ornatý úshin keldik», - dedi ol.
Brıýsselde ornalasqan Bostandyq pen abyroı úshin alıanstyń Taıaý Shyǵys jáne Soltústik Afrıka bóliminiń basshysy Ábdelmadjıd Mrarı HQS Gaza sektorynda jasalǵan qylmystarǵa qatysty sot bıligine ıe ekenin atap ótti.
Onyń aıtýynsha, Izraıl óziniń saıası jáne áskerı bıligi kórsetkendeı, Gaza sektoryn palestınalyqtardan etnıkalyq tazartýdy qalaıdy.
Palestına bıliginiń sońǵy málimetinshe, Izraıldiń Gaza sektoryna jasaǵan shabýylynyń 38-shi kúninde keminde 11 180 palestınalyq azamat qaza tapty, onyń ishinde 7 700-den astamy - áıelder men balalar, taǵy 28 200-den astam adam jaraqat aldy.
Izraıldiń ótken aıdan beri qorshaýdaǵy anklavqa áýeden jáne qurlyqtan talaı shabýyl jasaý saldarynan myńdaǵan ǵımarat, sonyń ishinde aýrýhanalar, meshitter men shirkeýler zaqymdanǵan nemese qıraǵan.
Osy arada, resmı málimetke sáıkes, Izraılde qaza tapqandar sany 1200 adamdy qurady.
