Gaza sektorynda nóser jańbyrdan balalar qaza taýyp, myńdaǵan otbasy baspanasyz qaldy
ASTANA. KAZINFORM — Gaza sektorynda nóser jańbyr jaýyp, sonyń saldarynan keminde bes adam, onyń ishinde tórt bala qaza tapty. Myńdaǵan otbasy baspanasy men dúnıe-múlkinen aıyryldy, dep habarlaıdy Kazinform agenttigi BUU jańalyqtar qyzmetine silteme jasap.
BUU-nyń Gýmanıtarlyq máselelerdi úılestirý basqarmasynyń málimetinshe, aldyńǵy demalys kúnderi Gaza sektorynda osy maýsymda alǵash ret jaýyn-shashyn mol túsip, májbúrli qonys aýdarǵan adamdar ornalasqan aýmaqtardy sý basty.
Sý tasqyny saldarynan bir sábı sýǵa batyp ketti. Taǵy úsh bala men keminde bir áıeldiń ústine qum tóbesi qulap, qaza tapty. Qum kóshkini olardyń shatyrlaryn basyp qalǵan.
Gýmanıtarlyq uıymdar BUU agenttikterimen birlesip, zardap shekken otbasylarǵa kómek kórsetip jatyr. Mamandar jınalǵan sýdy sorǵyzyp, sý aǵyzý júıelerin jaqsartyp, ýaqytsha baspanalardy qum toltyrylǵan qaptarmen nyǵaıtyp jatyr. Sondaı-aq turǵyndarǵa eń qajetti zattar jetkizildi. Alaıda qolda bar tehnıka men materıaldar halyqtyń barlyq qajetin óteýge jetkiliksiz.
BUU-nyń Taıaý Shyǵystaǵy beıbitshilik úderisi jónindegi arnaýly úılestirýshisiniń orynbasary Ramız Alakbarov Gaza sektory turǵyndarynyń basym bóligi tipti ortasha deńgeıdegi daýylǵa da tótep bere almaıtyn, ábden tozǵan shatyrlarda turýǵa májbúr ekenin aıtty.
Ol Gazaǵa jyljymaly sorǵylardy, aýyr tehnıkany, shatyrlardy, brezentterdi, kórpeler men qysqy kıimderdi jetkizýge kedergi keltirip otyrǵan shekteýler men kidiristerdi retteýge úndedi. Sonymen qatar gýmanıtarlyq uıymdarǵa qajetti materıaldardy satyp alý úshin shuǵyl qarjy kerek ekenin aıtty.
BUU málimetinshe, Gaza sektoryndaǵy eldi mekenderge áli de shabýyl jasalyp, saldarynan beıbit turǵyndar qaza taýyp jatyr. Uıym halyqaralyq gýmanıtarlyq quqyq talaptaryna sáıkes azamattyq halyqtyń qaýipsizdigin qamtamasyz etýge taǵy da úndedi.
Eske salaıyq, buǵan deıin AQSh prezıdenti Donald Tramp telefon arqyly áńgime barysynda Izraıl premer-mınıstri Bınıamın Netanıahýdy Gazadaǵy beıbitshilik josparyn ilgeriletýdi suraǵanyn jazǵanbyz.
