Gaza sektoryn mınadan tazartý 30 jylǵa deıin sozylýy múmkin - gýmanıtarlyq uıym

ASTANA.KAZINFORM - Anklav «kartaǵa salynbaǵan mına alańyna» aınaldy, dep habarlaıdy Kazinform agenttiginiń menshikti tilshisi.

Gaza sektoryn tolyǵymen mınadan tazartý 20-30 jylǵa sozylýy múmkin, dep habarlaıdy Reuters halyqaralyq Humanity & Inclusion uıymyna silteme jasap.

Humanity & Inclusion ókili Nık Orr Izraıl men HAMAS arasyndaǵy eki jyldyq soǵys kezinde jarylmaǵan oq-dáriler beıbit turǵyndar úshin negizgi qaýipke aınalǵanyn aıtty. BUU derekqoryna sáıkes, soǵystan qalǵan jarylǵysh qaldyqtarynan kem degende 53 adam qaza taýyp, júzdegen adam jaraqat alǵan.

-Eger biz mınadan tolyq tazartý týraly aıtatyn bolsaq, ol eshqashan tolyq tazarmaıdy. Oq-dáriler jer astynda jáne ol kelesi býyn urpaqqa da kesirin tıgizýi múmkin. Jer betindegisin tazartýǵa shamamen 20-30 jyl ketýi múmkin, - dedi Nık Orr.

Ol bul jaǵdaıdy Ekinshi dúnıejúzilik soǵystan keıingi brıtandyq qalalarmen salystyrdy.

Jaqyn arada uıymnyń jeti múshesi aýrýhanalar men naýbaıhanalardy qosa alǵanda, basqa da mańyzdy ınfraqurylym nysandaryn zertteýdi bastaıdy. Alaıda, gýmanıtarlyq uıymdar áli kúnge deıin Izraıl bıliginen jumys júrgizýge nemese qajetti jabdyqtardy ımporttaýǵa ruqsat alǵan joq.

Nık Orr sonymen qatar gýmanıtarlyq mıssııalardyń qaýipsizdigin qamtamasyz etý úshin AQSh usynǵan 20 tarmaqtan turatyn atysty toqtatý josparynda kózdelgendeı, ýaqytsha halyqaralyq kúsh qurý qajettiligin atap ótti.

-Eger Gazada beıbitshilik ornasa, gýmanıtarlyq uıymdardyń jumys isteýine múmkindik beretin kúsh qajet, - dedi uıym ókili.

«Humanity & Inclusion» qazirgi ýaqytta oq-dárilerdi jarylmaı qaýipsiz jaǵa alatyn, olardy keıinnen sodyrlardyń paıdalanýyna jol bermeıtin mamandandyrylǵan bólimshelerdi jetkizýge ruqsat surap otyr.

Gazanyń Azamattyq qorǵanysy 18 qazanda aımaqta shamamen 70 000 tonna jarylmaǵan oq-dári bar ekenin, bul turǵyndardyń ómirine qaýip tóndiretinin málimdedi.

Gazadaǵy densaýlyq saqtaý salasyn qalpyna keltirýge 7 mıllıard dollar qajet ekeni týraly jazdyq.