Gaza sektory qol-aıaǵy ampýtatsııalanǵan balalar sany boıynsha álemde birinshi orynǵa shyqty

ASTANA. KAZINFORM – Gaza sektorynda 14 aıdan beri jalǵasyp kele jatqan soǵys múgedek balalar sanynyń kúrt ósýine sebep boldy. Birikken Ulttar Uıymynyń Taıaý Shyǵystaǵy palestınalyq bosqyndarǵa kómek kórsetý jáne olarmen jumys isteý jónindegi agenttiktiń málimdemesine sáıkes, álemde jan basyna shaqqanda aıaq-qoly kesilgen balalar sany jaǵynan Palestına birinshi orynda tur.

Taıaý Shyǵystaǵy palestınalyq bosqyndarǵa kómek kórsetý jáne olarmen jumys isteý jónindegi agenttiktiń habarlaýynsha, soǵysqa deıin mundaǵy árbir besinshi otbasynda kem degende bir múgedek bolǵan. Olardyń jartysyna jýyǵy - múmkindigi shekteýli bala.

- Osy soǵys bastalǵaly beri erekshe qamqorlyqqa muqtaj adamdar únsiz qalyp, azappen betpe-bet keldi. Olardyń ómirleri men qıyndyqtary týraly tym sırek aıtylatyn. Sonymen qatar soǵys kezinde ońaltý qyzmetterine qol jetkizý múmkin bolmady, - delingen aqparatta.

Balalardyń kópshiligi anestezııasyz ota jasatyp, aıaq-qoldarynan aıyrylǵan.

- Qazir Gaza sektory jan basyna shaqqandaǵy ampýtatsııalanǵan balalar sany boıynsha álemde birinshi orynǵa shyqty, - delingen habarlamada.

Qyrkúıek aıynda Dúnıejúzilik densaýlyq saqtaý uıymy 22 500-den astam adam nemese Gaza sektoryndaǵy soǵystan zardap shekken árbir tórtinshi adamnyń ómirin ózgertetin jaraqat alǵany jaıly aqparat taratty. Bul adamdarǵa ońaltý qyzmetteri aýadaı qajet.

Kún saıyn 10 bala bir nemese eki aıaǵynan aıyrylady.

Osyǵan deıin Amnesty International Izraıldi Gaza sektorynda genotsıd jasady dep aıyptaǵany týraly jaz,an edik.