Gaza sektory keminde 10 jylǵa AQSh protektoratyna berilýi múmkin

ASTANA. KAZINFORM - AQSh prezıdenti Donald Tramp ákimshiliginiń Gaza sektoryn qalpyna keltirý jospary Palestına anklavyn kem degende 10 jylǵa amerıkalyq protektoratqa berýdi, sondaı-aq onyń barlyq turǵynyn ýaqytsha qonystandyrýdy kózdeıdi. Bul týraly AQSh ákimshiligindegi derekkózderge silteme jasap The Washington Post habarlady.

Basylymnyń habarlaýynsha, Amerıka bıligi Gaza sektoryn qaıta qurý, ekonomıkalyq damytý jáne transformatsııalaý úshin GREAT Trust (Gaza Reconstitution, Economic Acceleration and Transformation Trust) dep atalatyn trast qoryn qurý jobasyn ázirledi.

WP málimetinshe, ol «anklavty kem degende 10 jylǵa amerıkalyq protektoratqa berýdi» qarastyrady.

Amerıka Qurama Shtattary Gaza sektoryn qalpyna keltirýge óz qarajatyn salmaı, kem degende 100 mıllıard dollar ınvestıtsııa tartýdy josparlaıdy, bul ınvestorlarǵa tórt ese paıda ákelýi kerek.

Sonymen birge, josparda «kem degende Gazanyń eki mıllıonnan astam halqyn ýaqytsha kóshirý» qarastyrylǵan. Múlikti odan ári qalpyna keltirýge berýge daıyn jer ıelerine basqa jerlerden jyljymaıtyn múlik satyp alý nemese anklav aýmaǵynda qurylysy josparlanǵan «aqyldy qalalardyń» birinen páterge aıyrbastaý úshin paıdalanýǵa bolatyn «tsıfrlyq aktıvter» usynylýy múmkin.

Sondaı-aq josparda Gaza sektorynan ketýge májbúr turǵyndarǵa 5 myń dollar kóleminde bir rettik tólem jáne sýbsıdııa qarastyrylǵan.