Gaza sektory, Aýǵanstan, ǵaryshtaǵy qarý jarysy: UQShU-nyń Astana deklaratsııasy qandaı máselelerdi qozǵady
ASTANA. KAZINFORM – Ujymdyq qaýipsizdik týraly shart uıymy Ujymdyq qaýipsizdik keńesi Astana sessııasynyń qorytyndysy boıynsha deklaratsııa qabyldady. Bul jolǵy deklaratsııada uıymǵa múshe elderdiń basshylary Gaza sektory men Lıvandaǵy jaǵdaıǵa, ǵarysh keńistiginde qarýlaný jarysynyń órshý qaýpine alańdaıtyndaryn bildirgen.
«Gaza sektory men Lıvanda bolyp jatqan beıbit turǵyndar arasyndaǵy joıqyn gýmanıtarlyq daǵdarys pen eleýli shyǵyndarǵa ákelgen Palestına-Izraıl qaqtyǵysyna alańdaýlymyz. Gaza sektorynyń aýmaǵynda jáne jalpy óńirde jaýyngerlik is-qımyldardy turaqty toqtatýǵa, gýmanıtarlyq kómekti úzdiksiz jáne qaýipsiz jetkizýdi qamtamasyz etýge, qarýly qaqtyǵys aımaǵyn keńeıtpeý úshin ustamdylyqqa shaqyramyz», - delingen deklaratsııa mátininde.
Qujatta Palestına máselesin birjola retteý úshin táýelsiz Palestına memleketi qurylý kerektigi de aıtylǵan.
Sondaı-aq, UQShU-ǵa múshe elderdiń irgedegi Aýǵanstan taǵdyryna beıjaı qaraı almaıtyny atap ótilgen.
«Biz Aýǵanstannyń soǵystan, terrorızm men esirtkiden arylǵan beıbit, táýelsiz jáne birtutas memleket retinde qalyptasýyn jaqtaımyz. Aýǵanstanda turaqty jáne gúldengen memleket qurý úshin halyqtyń barlyq sanaty men etnıkalyq toptardyń múddelerin bildiretin ınklıýzıvti bılikti qalyptastyrý mańyzdy ekenin atap ótemiz», - dep jazylǵan deklaratsııada.
UQShQ elderiniń basshylary ǵarysh keńistiginde qarýlaný jarysyna jol bermeý úshin naqty kelissózderdi jyldamdatyp ótkizý kerek degen ustanymdy jaqtaıdy.
«Biz ǵarysh keńistiginde qarýlaný jarysynyń aldyn alý úshin ortaq kúsh-jigerdi jandandyrý qajet ekenin atap ótemiz.
Bul ǵarysh keńistigine qarý ornalastyrmaýǵa, ǵarysh nysandaryna nemese olardy paıdalaný kezinde kúsh qoldanbaýǵa zańdyq turǵyda mindetteıtin kópjaqty kelissózderdi tezirek iske qosý úshin qajet», - delingen qujatta.