Gaza sektory: AQSh «Beıbitshilik keńesi» basshylyǵynyń quramyn jarııalady
ASTANA. KAZINFORM – Gaza sektoryndaǵy beıbitshilikti retteýde mańyzdy ról atqarady dep kútiletin «Beıbitshilik keńesiniń» atqarýshy keńesiniń quramyna basqalarmen qatar AQSh Memlekettik hatshysy Marko Rýbıo, AQSh prezıdentiniń arnaıy elshisi Stıven Ýıtkoff, Donald Tramptyń kúıeý balasy Djared Kýshner, Dúnıejúzilik bank prezıdenti Adjaı Banga jáne Ulybrıtanııanyń burynǵy premer-mınıstri Tonı Bler kiredi.
Bul týraly Aq úıdiń saıtynda juma, 16 qańtarda jarııalanǵan baspasóz habarlamasynda aıtylǵan, dep habarlaıdy DW.
Qujatta «Beıbitshilik keńesi» strategııalyq baqylaýdy qamtamasyz etý, halyqaralyq resýrstardy jumyldyrý jáne «Gazanyń qaqtyǵystan beıbitshilik pen damýǵa ótýi kezinde jaýapkershilikti qamtamasyz etý» arqyly Tramptyń Gazaǵa arnalǵan 20 tarmaqtan turatyn josparynyń júzege asyrylýyn kepildendirýi tıis ekeni aıtylǵan. Bul organdy Donald Tramptyń ózi basqaratyn bolady.
«Gaza sektorynyń atqarýshy keńesi»
Gaza sektorynyń Joǵarǵy ókili bolyp Bolgarııa dıplomaty Nıkolaı Mladenov taǵaıyndaldy. Aq úı atap ótkendeı, onyń mindetteriniń biri – Palestınanyń tehnokratııalyq ákimshiligi men «Beıbitshilik keńesi» arasyndaǵy ózara árekettesýdi qamtamasyz etý.
Budan basqa, Joǵarǵy ókil keńsesi men tehnokratııalyq ákimshilikti qoldaý úshin «Gaza sektorynyń atqarýshy keńesi» quryldy. Mladenovtyń ózinen basqa onyń quramyna Ýıtkoff, Kýshner, Bler, Túrkııa SІM basshysy Hakan Fıdan, BAÁ-niń halyqaralyq yntymaqtastyq jónindegi memlekettik mınıstri Rım ál-Hashımı jáne basqalar kirdi.
Gaza sektory úshin «Beıbitshilik keńesin» qurý
«Beıbitshilik keńesiniń» qurylýy Gaza sektoryndaǵy kúndelikti ómirdi basqarý mindeti júktelgen 15 músheden turatyn Palestına tehnokratııalyq bıliginiń qurylýy týraly jarııalanǵannan keıin kóp uzamaı jarııalandy.
14 qańtarda AQSh prezıdentiniń arnaıy ókili Ýıtkoff Tramptyń atynan Gaza sektoryndaǵy atysty toqtatýdyń ekinshi kezeńine kóshý týraly jarııalady. Bul kezeń basqalarymen qatar HAMAS-ty qarýsyzdandyrý jáne Palestına polıtsııasyn qoldaý úshin Gaza sektoryna Halyqaralyq turaqtandyrý kúshterin (HTK) ornalastyrýdy qamtıdy.
Aq úıdiń baspasóz habarlamasyna sáıkes, HTK qolbasshysy bolyp AQSh Ortalyq qolbasshylyǵynyń (CENTCOM) Arnaıy operatsııalar kúshteriniń burynǵy qolbasshysy general-maıor Djasper Djeffers taǵaıyndaldy.
Eske sala ketsek, Tramp Gaza boıynsha beıbitshilik keńesi qurylatynyn málimdedi.
ıÝNISEF buǵan deıin Gazada atysty toqtatý týraly kelisim kúshine engennen beri 100-den astam balanyń qaza tapqanyn habarlaǵan bolatyn.
