Gaza gýmanıtarlyq qorynyń basshysy qarjylandyrý kózi týraly aqparat berýden bas tartty
ASTANA. KAZINFORM – «Gaza Humanitarian Foundation» (GHF) uıymy BUU men gýmanıtarlyq toptardyń synyna ushyrady. Sebebi uıym Izraılden táýelsiz emes dep tanyldy. GHF-ti Izraıl men AQSh birlesip qoldap otyr, dep habarlaıdy NBC News.
Gaza sektoryndaǵy gýmanıtarlyq kómek taratý pýnktterinde qaıtalanyp jatqan qandy qaqtyǵystar men zorlyq-zombylyq oqıǵalary GHF («Gaza Humanitarian Foundation») qorynyń qarjylandyrý kózi men Izraılden táýelsizdigine qatysty kúmándi kúsheıtti.
GHF basshysy Djonnı Mýr uıymnyń demeýshilerin nege jasyryn ustaıtyndaryn bylaı túsindirdi.
— Kóptegen jekemenshik qor sııaqty, biz de donorlarymyzdy jarııalamaımyz. Biz ne istesek te, ne aıtsaq ta, ol bizdiń mıssııamyzdan nazardy burady. Al bizdiń jalǵyz maqsatymyz — Gazadaǵy turǵyndardy tamaqtandyrý, dedi ol.
Izraıl bul uıymdy qarjylandyryp, baqylaıdy degen aıyptarǵa Mýr «Meniń bilýimshe, bul — Izraıl úkimeti qarjylandyrmaıtyn, táýelsiz bastama» dep jaýap berdi.
BUU men birneshe iri gýmanıtarlyq uıym GHF-pen yntymaqtastyqtan bas tartyp otyr. Sebebi uıym gýmanıtarlyq qaǵıdalardy buza otyryp, kómek alýshylardy tańdaýda Izraılge sheshim qabyldaý quqyǵyn berip qoıǵan. Bul jaǵdaı Gazada jappaı qonys aýdarýǵa sebep bolyp, kómek tek keıbir aımaqtarda shoǵyrlanyp jatyr. Halyqaralyq qutqarý komıtetiniń aǵa vıtse-prezıdenti Kıran Donnellı GHF-tiń azyq-túlik taratatyn pýnktteriniń tym az ekenin, bul palestınalyqtardyń ómirine qaýip tóndiretinin aıtty. Onyń aıtýynsha, eshbir gýmanıtarlyq uıym mundaı júıeni usynbaıdy.
Keıbir aýyr jaraqat alǵan nemese múgedek azamattar kómek alý úshin qaýipti aımaqtar arqyly uzaq jol júrip, aptap ystyqta jaıaý barýǵa májbúr. Bul da jaǵdaıdy odan ári ýshyqtyryp otyr.
Ótken aıda Izraıl parlamentinde sóılegen oppozıtsııa jetekshisi ıAır Lapıd, naqty dálelder keltirmesten, premer-mınıstr Bınıamın Netanıahý úkimetin sheteldik deldal kompanııalar arqyly GHF-ti qarjylandyryp otyr dep aıyptady. Al ótken aptada Izraıldiń memlekettik Kan telearnasy aty atalmaǵan úkimet ókilderine silteme jasap, Izraıl bıliginiń atalǵan uıymǵa júzdegen mıllıon shekel bólgenin habarlady. Alaıda Izraıl úkimeti muny úzildi-kesildi joqqa shyǵardy.
TRIAL International quqyq qorǵaý uıymy GHF-tiń Jenevadaǵy keńsesine baılanysty Shveıtsarııa úkimetin tergeý júrgizýge shaqyrdy. Atalǵan uıymnyń málimdeýinshe, azyq-túlikke qoljetimdiliktiń bolmaýy soǵys qylmysy retinde qarastyrylýy múmkin.
GHF málimetinshe, olar tórt kómek kórsetý pýnktiniń úsheýin ǵana ashqan. Bul oryndardy burynǵy amerıkalyq áskerı merdigerler men jaqyn mańdaǵy ızraıldik áskerıler kúzetedi. Gazanyń soltústik bóligi áli kúnge deıin eń qaýipti aımaq bolyp otyr, ol jaqta aýyr urystar jalǵasyp jatqandyqtan, kómek kórsetý pýnkti ashylmaǵan.
Buǵan deıin ekoaktıvıst Greta Týnberg óz jaqtastaryn Gazadaǵy soǵysty toqtatyp, turaqty gýmanıtarlyq kómekti qamtamasyz etý úshin úkimetterge qysym jasaýǵa shaqyrǵan bolatyn.
Aıta ketelik Gazada gýmanıtarlyq kómek taratý kezinde 50 shaqty adam jaralanǵany týraly jazǵan edik.