Gaz jetkizýshiler zań buzsa qatań jazalanýy tıis - Saparbaev
AQTÓBE. QazAqparat - Aqtóbedegi gaz tapshylyǵy máselesin quqyq qorǵaýshylar men ulttyq qaýipsizdik komıtetiniń oblystyq departamenti, memlekettik organdar tekseredi. Bul týraly Aqtóbe oblysy ákiminiń baspasóz qyzmetine silteme jasap QazAqparat tilshisi habarlaıdy.
Aqtóbede suıytylǵan gaz tapshylyǵy máselesi jıi týyndap júr. Túni boıy kezekke turǵan júrgizýshiler shaǵymdy kimge aıtaryn bilmeıdi. Buǵan deıin habarlaǵanymyzdaı , másele deldaldarda ekeni anyqtalyp, zaýyttan gaz jetkizýshilerdiń qujaty durys bolmaı shyqty. Búgin osy másele oblys ákimdiginde talqylandy. Aqtóbe oblysynyń ákimi Berdibek Saparbaev arnaıy jumys tobyn quryp, tekserýge tapsyrma berdi. Jumys tobynyń quramynda UQKD, ІІD, prokýratýra, Memlekettik kirister departameti, Tabıǵı monopolııalardy retteý jáne básekelestikti qorǵaý departamenti, memlekettik mekemeler men gaz taratý qaýymdastyǵynyń ókilderi bar.
«Jóneltý kestesi boıynsha gaz Aqtóbege kún saıyn artyǵymen jetkizilip jatyr. Tapshylyq bolmaý kerek. Alaıda tekserýler kórsetkendeı keshe barlyq janar-jaǵar maı beketterinde kezek bolǵan, gaz talonmen jiberilgen. Buǵan ne sebep? Eger bul jerde gazdy eksporttaý, kórshi aımaqtarǵa jetkizý, taýardy baǵany kóterý úshin ustap turý sekildi zańsyzdyqtar tirkelse, zań buzýshylar anyqtalyp, qatań jaýapkershilikke tartylýy tıis»,- dep atap ótti B.Saparbaev.
Aqtóbe oblysyna gazdy eki operator jetkizýi tıis. «Elaman» JShS temirjol arqyly, «Kepil sapa» JShS avtojolmen tasymaldaıdy. Aqtóbe qalasyna kúnine orta eseppen 322 tonna gaz jetkizip turý jumysy eki kompanııaǵa mindettelgen. Gaz tasylmaldaýshylar qaýymdastyǵy tóraǵasynyń orynbasary Altynaı Mahanovanyń aıtýynsha, «Elaman» JShS-i eki kún boıy gazdy tasymaldamaǵan. Saldarynan janarmaı beketteri alańdap, gaz taratý mólsherin shektedi.
«Suıytylǵan gaz quıý beketterindegi kezek máselesi aı saıyn qaıtalanyp otyr. Bul jerde másele týyndatýdyń reti joq edi. Óıtkeni aımaqqa bólinetin gaz kólemi naqty suranystan áldeqaıda kóp. Men jumys tobyna máseleniń túp-tamyryn anyqtaýdy jáne ony joıý úshin túbegeıli sharalardy qabyldaýdy tapsyramyn»,- dedi B.Saparbaev.
