Gaz jetkizýshi kompanııanyń Atyraýdaǵy fılıaly kásipkerge jarty jyl kedergi jasaǵan
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, jergilikti kásipker «QazTransGaz Aımaq» AQ Atyraý óndiristik fılıalynyń áreketsizdigine jáne ákimshilik kedergi jasaǵany týraly óńirlik shaǵym túsirgen. Ol mundaı shaǵymmen óńirdegi kásipkerlik palatasyna da júgingen.
«Kásipker ótken jyldyń jeltoqsan aıynan beri óndiristik fılıalǵa jumystardy qabyldaý jónindegi komıssııany bólý, esepke alý torabyn paıdalanýǵa qabyldaý aktisine qol qoıý týraly birneshe ret júgingen. Alaıda, «QazTransGaz Aımaq» AQ-nyń Atyraý óndiristik fılıaly jýrnaldardy, tehnıkalyq sharttardy tekserý qajettiligimen jaýap berýden bas tartqan. Bul satý bóliminiń ókilettikteri men fýnktsııalaryna qaıshy keledi. Óıtkeni atalǵan bólim eseptegish qýatynyń gaz jabdyqtaryna sáıkestigin tekseredi. Osyndaı áreketsizdiktiń nátıjesinde kásipker tapsyrys berýshi aldyndaǵy mindetterdi oryndaý merziminiń aıaqtalýyna baılanysty shyǵynǵa ushyraǵan», -dep habarlady .
Departament qyzmetkerleri osyǵan baılanysty múddeli organdarmen jáne tulǵalarmen kezdesý uıymdastyrdy. Kezdesýden keıin gazdy esepke alý torabyn paıdalanýǵa qabyldaý aktisine qol qoıyldy.
Eske sala ketelik, budan buryn gaz tasymaldaýshy kompanııanyń Atyraýdaǵy fılıaly 3,2 mln teńge aıyppul tólegenin jazǵan edik.
Tabıǵı monopolııalardy retteý komıteti Atyraý oblysy boıynsha departamentine eki tutynýshydan «QazTransGazAımaq» AQ Atyraý óndiristik fılıalyna qatysty shaǵym túsken. Shaǵymdanýshylar fılıaldyń gazben jabdyqtaý jelilerine qosýǵa tehnıkalyq sharttardy berýden bas tartqanyn kórsetken.
Sottyń 2023 jylǵy 24 naýryzdaǵy qaýlysymen «QazTransGazAımaq» AQ-nyń Atyraý óndiristik fılıalyna 3 mln 267 myń 040 teńge kóleminde aıyppul salyndy. Aıyppul tolyqtaı tólendi.
