Gaz jelisine qosylǵysy kelgen atyraýlyq kásipkerdiń ótinishi bir jyldan beri sheshimin tappaǵan

ATYRAÝ. QazAqparat – Atyraýlyq kásipkerdiń gaz jelisine qosylý jónindegi ótinishi bir jyldan beri sheshimin tappaǵan, dep habarlaıdy QazAqparat.

Óńirlik kommýnıkatsııalar qyzmetiniń málimetinshe, oblystyq kásipkerler men jumys berýshiler odaǵynda kezdesý ótken.

Oǵan kásipkerler, ákimdikter men monopolıst mekemelerdiń ókilderi qatysty.

Shaǵyn jáne orta bıznes ókilderiniń aıtýynsha, kásipkerlik nysandar úshin jer bólýde týyndaǵan problema bar.

Jergilikti bılik ókilderi kásipkerlermen ashyq dıalog ornatýǵa yntaly emes.

«Memleket basshysy Qasym-Jomart Toqaev halyqqa Joldaýynda «Ashyq ákimdik» jumysyn jandandyrý máselesin aıtqan edi. Osy bastama aıasynda biz ákimdik ókilderimen ashyq dıalogta kezdesý uıymdastyrdyq. Bul kezdesýden soń ortaq sheshimder qabyldanady degen oıdamyn», -deıdi Atyraý oblystyq kásipkerler men jumys berýshiler odaǵynyń basshysy Aıbar Janııazov.

Máselen, «Mogıkan» shaǵyn zaýytynyń basshysy Aısulý Orazbaevanyń pikirinshe, jergilikti ákimdikter tarapynan otandyq kásipke qoldaý kerek.

«Biz óndiristi damytý arqyly ǵana elimizdiń kórkeıýine úles qosa alamyz. Sebebi, jańa jumys oryndary ashylyp, kásipkerler sany kóbeıedi. Alaıda, óndiris ornyn ashqan kásipkerlerde taýar satý problemasy týyndap otyr. Máselen, men jýǵysh zattardy shyǵaratyn shaǵyn zaýyt ashtym. Bul – Atyraý oblysyndaǵy alǵashqy óndiris. Alaıda, bizdiń taýarymyz tek bazarda ǵana ótimdi bolyp tur. Ónimderimizdi jergilikti mekemeler, aýrýhanalar alsa, óndiristiń qanat jaıýyna jol ashylar edi», -dedi Aısulý Orazbaeva.

Sondaı-aq, kásipkerler ınfaqurylym máselesin de kóterdi. On eki jyldyq tájirıbesi bar Maıra Muhanbetova qurylysy aıaqtalǵan sport zalǵa jylý júıesin tarta almaı júr.

«Men 2018 jyldan beri jastardyń sport komandasyna demeýshi bolyp kelemin. Atyraý qalasynda fýtzaldyń azdyǵynan jastarǵa arnalǵan sport zalyn ashýdy qolǵa aldym. Osyǵan baılanysty 2020 jyly sýbsıdııa alyp, keshenniń qurylysyn aıaqtadyq. Jylý júrgizý úshin gaz jelisine qosylý kerek. Sol sebepten, byltyrǵy naýryzda «QazTransGazAımaq» AQ-ǵa ótinish berdim. Alaıda, arada 1 jyl ótse de bul mekeme bizge gaz júrgizýge ruqsatyn bergen joq. Janymyzda salynǵan úılerde gaz bar. Al, bizge jetpeı tur. Bizdiń osy máselemiz sheshilmeı keledi», -dedi Maıra Muhanbetova.

Eske sala ketelik, budan buryn Atyraý oblysynda 23 myńǵa jýyq jumys orny ashylatynyn habarlaǵan bolatynbyz.