Gaz jarylysynan kúıik shalǵan áıel asa aýyr halde
ORAL. QazAqparat - Oraldaǵy turǵyn úıde bolǵan gaz jarylysynan kúıik shalǵan áıeldiń jaǵdaıy asa aýyr kúıinde qalyp otyr, dep habarlaıdy «QazAqparat» tilshisi.
Oblystyq klınıkalyq aýrýhana dırektory Erlan Toqsanovtyń aıtýynsha, qazirgi ýaqytta ony aman alyp qalý maqsatynda qoldan kelgenniń bári jasalýda. Qajetti dári-dármek jetkilikti, áıel dárigerlerdiń únemi baqylaýynda.
«Búgin Astanadaǵy Travmatologııa jáne ortopedııa ǵylymı-zertteý ortalyǵynan órt jaraqaty boıynsha bilikti maman arnaıy keldi. Ol oblystyq aýrýhana qyzmetkerlerimen keńese otyryp, birge jumys jasaýda», dedi E.Toqsanov.
Eske sala keteıik, 18 qarasha kúni saǵat 09.58 shamasynda Oralǵa qarasty Zachagan kentindegi turǵyn úıde gaz-aýa qospasynyń jarylysy bolyp, alty adam zardap shegip, sonyń ishinde 37 jasar áıeldiń denesin 85 paıyz kúıik shalyp, keıin onyń ishtegi sábıi shetinep ketken edi.
