Gaz tasymaldaıtyn kólik jaryldy: Bir adam kóz jumdy
TALDYQORǴAN. QazAqparat - Almaty oblysynda gaz tasymaldaıtyn kólik qoparyldy, bir adam qaza tapty. Taǵy úsh adamnyń ómirlerin polıtsııa qutqaryp qaldy, dep habarlaıdy QazAqparat tilshisi.
«18 shildede saǵat 20:05-ter shamasynda «Almaty-Óskemen» avtojolynyń 548 shaqyrymynda gaz tasymaldaıtyn «ZIL-130» júk kóligi «Pejo-307» kóligine soǵylǵan. Almaty oblystyq Polıtsııa departamenti baspasóz qyzmetiniń málimetinshe, jol apatynan birneshe adam zardap shegip, bir adam qaıtys boldy.
Soltústik baǵytta qozǵalyp kele jatqan «ZIL-diń» 38 jastaǵy júrgizýshisy rýldi basqara almaı «Pejo-307» avtokóligimen soqtyǵysqan. Patrýldik ekıpajda eki polıtsııa qyzmetkeri – polıtsııa aǵa leıtenanty Maksım Shevchenko men polıtsııa leıtenanty Rýslan Medelhanov bolǵan.
Gaz tasymaldaıtyn kólik ekpinimen taǵy eki kólikty soqqan. Birinshi qarsy baǵytta kele jatqan «Mazda-626» markaly avtokóligi, al keıin «Reno» markaly júk kóligine toǵylǵan. Osydan keıin «ZIL» jol jıegine shyǵyp, aýdarylyp qalǵan. Birneshe mınýttan keıin gaz tasymaldaıtyn kólik jarylyp, tolyqtaı janyp ketken.
Jol apatynda 48 jastaǵy «Mazda - 626» júrgizýshisi aýyr jaraqat alyp, sol jerde kóz jumdy.
Jarylystan birneshe sekýnd qalǵanda polıtsııa qyzmetkerleri, gaz tasymaldaıtyn kólik júrgizýshisin qutqarýǵa umtylǵan. Olar sdereý júrgizýshini qaýipti aımaqtan súırep shyǵaryp alǵan.
Sonymen qatar, polıtseıler jol-kólik oqıǵasynan zardap shekken basqa kóliktegilerdi qutqaryp, olarǵa alǵashqy medıtsınalyq kómek kórsetken. «ZIL» júrgizýshisi Úsharal qalasynyń aýrýhanasyna jetkizildi.
Sondaı-aq, osy JKO saldarynan patrýlder de zardap shekken, olar kóptegen jaraqat alǵan. Biraq, tártip saqshylary buǵan qaramastan, óz mindetin atqarýdy jalǵastyrǵan.
Jedel járdem kelgenge deıin zardap shekkenderge alǵashqy medıtsınalyq kómek kórsetip, jol-kólik oqıǵasy bolǵan jerdi qorshap, basqa kólikterdiń ótýin qamtamasyz etken.
Qazirgi ýaqytta QR QK 345-baby 3-bólimi «Abaısyzda adam ólimine ákep soqqan jol qozǵalysy erejelerin buzý» boıynsha sotqa deıingi tergeý amaldary júrgizilýde.
