Gaz taratý stansasyndaǵy aqaý: Dánekerlengen qaqpaq ushyp, 12 myń tekshe metr gaz aýaǵa tarady

Aqtóbede gaz taratý stansasynda bolǵan aqaý kezinde aýaǵa 12 myń tekshe metr gaz tarady. Qazirgi kezde salynǵanyna 2 jyl bolǵan stansanyń qubyr qaqpaǵy nege ushyp ketkeni tekserilip jatyr. Mamandar mańyndaǵy bulaq pen kúni buryn jaýǵan jańbyr órttiń shyqpaýyna septigin tıgizdi dep boljap otyr, dep habarlaıdy Kazinform tilshisi.

Aqtóbe qalasy Bereke turǵyn úı alaby men Batys-2 mańyndaǵy gaz taratý stansasy 2021 jyly salynyp, Aqtóbe qalalyq TÚKSh, jolaýshylar kóligi jáne avtomobıl joldary bólimine berilgen. Munda búgin Shyǵys 1, 2, Baıanaýyl 1, 2 turǵyn alaptaryna gaz taratý úshin qosý jumysy júrgizilýi tıis edi. Alaıda túnde shyqqan aqaý jospardy ózgertti.

"Qala turǵyndaryn gazben qamtý úshin dál osy stansada gaz qysymyn kóterý kerek boldy. Buǵan deıin 7-8 keli gaz taratylsa, biz 9,5 kelige deıin kóterdik. Negizi gaz qubyry 12 kelige eseptelgen. Sol kezde gaz qubyryndaǵy dánekerlengen qaqpaq ushyp ketken. Dıametri – 300 mıllımetr. Dıspetcherler 9-qazan kúni saǵat 21:45-te qysymnyń tómen túsip ketkenin kórip, adamdardan habarlama túsip, oqıǵa ornyna dereý jettik. Sóıtip saǵat 22:45-te gaz shyǵýyn toqtattyq", - dedi Aqtóbe oblystyq magıstraldy gaz qubyrlary basqarmasynyń dırektory Dildabaı Taıshymov.

Onyń aıtýynsha, oqıǵanyń naqty qalaı bolǵanyn komıssııa anyqtaıdy.

«Shamamen 12 myń tekshe metr gaz aýaǵa tarady. Nege janbady, nege órtenbedi deıtin bolsaq, sol jerde bulaq bar eken. Bir jaǵynan jańbyr boldy, ekinshi jaǵynan jer sýly. Kishkentaı ot bolsa gaz janatyn edi. Sýly jer bolǵan soń aman qaldy. Janynda transformator da bar», - dedi Dildabaı Taıshymov.

Eske salsaq, keshe Aqtóbe qalasynda qubyrdan gaz ketip, aýaǵa tarady.