Gaz taratý kompanııalarynyń gaz qubyryna tikeleı qosylýy zańnamalyq turǵyda bekitilmek
ASTANA. KAZINFORM — Jeke ınvestor ınvestıtsııasyn qaıtarǵannan keıin gaz qubyrlaryn gaz taratý uıymynyń menshigine berýge mindetti bolady. Bul týraly Májilistiń jalpy otyrysynda depýtat Edil Jańbyrshın aıtty.
— Jyl saıyn eldi mekenderdi gazdandyrýǵa eleýli kólemde bıýdjet qarajaty bólinedi. Alaıda salynǵan nysandardyń bir bóligi ýaqytyly paıdalanýǵa berilmeı otyr. Negizgi sebepter — jobalyq sheshimderdegi kemshilikter men qurylys-montaj jumystarynyń olqylyqtary. Olar kóbinese nysandy qabyldaý satysynda ǵana anyqtalady. Sondaı-aq gazben jabdyqtaý obektilerin berý rásiminiń shamadan tys sozylýy, — dedi depýtat gazben jabdyqtaý jáne gazdy únemdi tutyný máseleleri boıynsha zań jobasyn tanystyra kele.
Edil Jańbyrshınniń aıtýynsha, búgingi tańda obektini berý birneshe kezeń arqyly júzege asyrylady. Sonyń saldarynan salynǵan kóptegen obekti jergilikti atqarýshy organdardyń balansynda qalyp, tıisti tehnıkalyq qyzmet kórsetýsiz otyr. Eń qıyny turǵyndar der kezinde kóńildir otyndy paıdalana almaýda.
Osy máseleni sheshý maqsatynda zań jobasy aıasynda mynadaı sharalar usynylady:
— bıýdjet qarajaty esebinen salynatyn obektiler boıynsha jobalaý tapsyrmasyn jobalaý-smetalyq qujattama ázirlengenge deıin QazaqGaz-ben mindetti túrde kelisý;
— qurylys barysynda tehnıkalyq monıtorıng júrgizý;
— elektr jelileri salasyndaǵy tájirıbe boıynsha, obektilerdi jergilikti atqarýshy organdardan tikeleı QazaqGaz balansyna berý arqyly tapsyrý rásimin jeńildetý.
— Sonymen qatar, deldaldardyń paıda bolýy da ózekti másele bolyp otyr. Tájirıbede bir gaz qubyrynda eki gaz taratý kompanııasynyń qatar jumys isteýi oryn alýda, bul «qos tarıftiń» qoldanylýyna ákeledi. Mundaı shemalardan deldaldar paıda kórip, qarjylyq júkteme tutynýshylardyń, negizinen halyqtyń moınyna júkteledi. Osyndaı tıimsiz deldaldardy boldyrmaý maqsatynda gaz taratý kompanııalarynyń magıstraldyq gaz qubyryna mindetti túrde tikeleı qosylýyn zańnamalyq turǵyda bekitý usynylady, — dedi ol.
Onyń sózine qaraǵanda, jeke ınvestorlarǵa qatysty másele de ózekti bolyp otyr. Olar gazdandyrylmaǵan kósheler men turǵyn alaptarǵa gaz qubyrlaryn salady. Alaıda óz shyǵyndaryn ótegennen keıin paıdalaný shyǵyndaryn kótergisi kelmeı, jelilerdi ıesiz kúıde qaldyrady. Búgingi tańda mundaı jelilerdiń jalpy uzyndyǵy 4 000 shaqyrymnan asady.
— Osy máseleni sheshý úshin jeke ınvestordy ınvestıtsııalary qaıtarylǵannan keıin gaz qubyrlaryn ózi qosylǵan gaz taratý uıymynyń menshigine berýge mindetteıtin norma engizý usynylady, — dedi Edil Jańbyrshın.
Aıta keteıik, taýarlyq gazdy únemdep paıdalaný mádenıetin qalyptastyrýǵa, sondaı-aq jeke jáne kommýnaldyq tutynýshylar úshin saralanǵan tarıf saıasatyn qurýǵa baǵyttalǵan zań jobasyna qatysty Edil Jańbyrshın Kazinform tilshisine suhbat bergen edi.
