Gaz tapshylyǵyna baǵanyń tómen bolýy sebep – Energetıka mınıstrligi

AQTÓBE. KAZINFORM – Aqtóbe oblysyna 14 600 tonna suıytylǵan gaz qajet. Qazan aıynda onyń 11 380 tonnasy bólindi. Tapshylyq – baǵanyń tómen bolýynan.

QR Energetıka mınıstrligi Kazinform tilshisiniń suıytylǵan gaz tapshylyǵyna qatysty suraǵyna jaýap joldady. Mınıstrliktiń málimetine súıensek, qazan aıynda suranystyń tek 77% jabyldy. 

— Aqtóbe oblysynan qazan aıynda 14 600 tonna suıytylǵan gazǵa suranys boldy. Onyń 11 380 tonnasy bólindi. Bul suranystyń 77% ǵana. Gaz tapshylyǵynyń negizgi sebebi — baǵanyń tómen bolýy, lıtrine 59-89 teńgeden satylýy. Baǵa tómen bolǵan soń benzınmen júretin kólikten gazǵa aýysyp, suranys artty, — dep habarlady QR Energetıka mınıstrliginiń baspasóz qyzmeti. 

QR Energetıka mınıstrliginiń aqparatyna súıensek, elimizde 11 kompanııa suıytylǵan gaz óndiredi. Onyń ishinde TShO suıytylǵan gazdy kommertsııalyq maqsatta shyǵarady. Qazaqstandaǵy qalǵan 10 óndirýshi jylyna 1 mln 562 myń tonna suıtylǵan gaz óndirse, suranys 1 mln 965 myń tonnany quraıdy. Defıtsıt 25% bolyp tur. Tórtinshi toqsandaǵy naryq suranysy 491 myń tonnany qurasa, mınıstrlik 427 myń tonna bóldi. Qazan aıynda 20%, qarasha aıynda 10%, jeltoqsan aıynda 10% tapshylyq báribir saqtalady. 

— QR ІІM-niń aqparatyna súıensek, 2021 jylmen salystyrǵanda 2022 jyly gazben júretin kólik sany 178 myńǵa artyp, ósim 57% jetti. 2023 jyly gazben júretin kólik sany 582 myńǵa jetti. Bul 2022 jylmen salystyrǵanda gaz tutynatyn kólik sanynyń 18% artqanyn kórsetedi. Mınıstrlik ár oblystyń jyl saıyn artyp kele jatqan suranysyn tolyq qamtý múmkin emes dep esepteıdi, — dep habarlady. QR Energetıka mınıstrliginiń baspasóz qyzmeti.

Aıta keteıik, Aqtóbede gaz tapshy. Gaz quıý beketterindegi kezek shildede bastaldy.