Gaz tapshylyǵy: Mańǵystaýda gazdy ózge óńirlerge satqan kásipkerler anyqtaldy

AQTAÝ. KAZINFORM — Oblystyq kásipkerlik jáne saýda basqarmasynyń basshysy Pikir Sansyzbaevtyń málimetinshe, Mańǵystaý — el boıynsha suıytylǵan munaı gazyn eń kóp tutynatyn óńirlerdiń biri. Aı saıynǵy qajettilik shamamen 18 myń tonna. Onyń negizgi bóligi Jańaózendegi «QazGÓZ» zaýytynan, qalǵany Atyraý munaı óńdeý zaýytynan jetkiziledi. 

Alaıda qazan aıynda Atyraý munaı óńdeý zaýyty josparly jóndeýge jabylýyna baılanysty, oblysqa qajetti 3658 tonna gaz Aqtóbedegi «SNPS-Aqtóbemunaıgaz» zaýytynan vagon arqyly tasymaldanyp jatyr. Logıstıkalyq baǵyttyń ózgerýi ónimniń keshigip jetýine jáne keıbir avtogaz quıý stantsııalarynda kezektiń paıda bolýyna áser etken.

Basqarma basshysynyń aıtýynsha, gaz tapshylyǵyna tek tasymaldaýdyń keshigýi emes, keıbir kásipkerlerdiń jaýapsyz áreketteri de sebep bolǵan.

— Keı kásipkerler ózderine bólingen gazdy bekitilgen stantsııalarǵa jetkizbeı, ózge óńirlerge satqan jaǵdaılar anyqtaldy. Sondaı-aq, keıbir jańa beketter aı saıynǵy kólemdi ulǵaıtý maqsatynda tirkelip, shyn máninde gazdy basqa núkteler arqyly ótkizgen. Biz gazdyń ár lıtriniń qaıda baǵyttalǵanyn tolyq tekseremiz, — deıdi basqarma basshysy.

Oblysta 552 avtogaz quıý stantsııasy bar. Basqarma basshysy Pikir Sansyzbaevtyń málimetinshe, Atyraý munaı óńdeý zaýytyndaǵy jóndeý jumystary qazan aıynyń sońyna deıin aıaqtalady. 1 qarashadan bastap suıytylǵan munaı gazynyń tóńireginde másele bolmaýy tıis.

Buǵan deıin, Aqtóbedegi suıytylǵan munaı gazynyń tapshylyǵy týraly jazǵan bolatynbyz.