Gaz tapshylyǵy: Qyzylordadaǵy ahýal qandaı
QYZYLORDA. KAZINFORM – Qazaqstannyń birqatar óńirinde tamyz bastalysymen gaz baǵasy ósti. Osyǵan oraı Qyzylorda oblysynyń ákimdigi aımaqtaǵy ahýal týraly resmı málimdeme jasady.
Ákimdik shilde aıynda operatorlarmen kelissóz júrgizdi. Nátıjesinde shilde aıynan qalǵan gaz eski baǵamen, ıaǵnı 85-90 teńgeden satyldy. Búgingi kúni eski baǵamen alynǵan gaz quıý beketterinde 586 tonna gaz qory bar. Odan basqa Atyraý zaýytynan 648 tonna jolda kele jatyr.
- Aımaǵymyzda 2022 jyly suıytylǵan munaı gazyn tutynatyn 7 290 kólik tirkelse, bıyl 35 690-ǵa jetti. Bul 3 jyl burynǵydan 5 ese kóp. Odan bólek, suıytylǵan gaz óndirisiniń ózindik quny — tonnasyna 70-80 myń teńge. Al óndirýshi zaýyttar úshin shekti kóterme baǵa tonnasyna 59 722 teńge deńgeıinde belgilengen. Qyzylorda oblysy basqa óńirlermen salystyrǵanda suıytylǵan munaı gazynyń eń tómengi baǵasy boıynsha birinshi bestikte. Elimizdiń 12 oblysynda gaz baǵasy 117 teńge deıin kóterilgen, - dedi oblys ákiminiń orynbasary Ardaq Zebeshov.
Oblysta operatorlar gazdy shekti baǵadan 5 teńgege arzanǵa, ıaǵnı oblys ortalyǵynda lıtrin 97 teńgeden (bekitilgen — 102 teńge), al aýdandarda 102 teńgeden (bekitilgeni — 102 teńge) satýǵa usynys bildirdi. Jalpy, tamyz aıyna mınıstrlik 7562 tonnaǵa jýyq gaz bólip otyr.
- Gaz tapshylyǵynyń aldyn alý maqsatynda is-sharalar atqarylyp jatyr. Memlekettik mekemelerde gazben júretin kólikterge benzın paıdalanýdy usyndyq. Operatorlar gaz quıý beketterinde aýyr júk kólikterine 3 myń teńgege deıin satýǵa shekteý qoıýdy durys kórip otyr. Aldaǵy ýaqytta qalalyq, aýdandyq kommýnaldyq jáne jeke mekemelerdiń tehnıkalary metan gazyna aýystyrylady. Qazirgi tańda aımaq suıytylǵan munaı gazymen tolyq qamtylǵan, - dedi Ardaq Zebeshov.
Eske salsaq, 2023 jyldyń qarashasynan bastap suıytylǵan munaı gazyn Qazaqstan Respýblıkasynyń shekarasynan tys jerlerge avtomobıl jáne temirjol kóligimen áketýge tyıym salyndy. Eksportqa tyıym salý týraly buıryqtyń merzimi 2025 jyldyń 14 mamyrynda aıaqtalady.