Gaz stansasyndaǵy jarylys: Oqıǵaǵa qatysty qylmystyq is qozǵaldy
Qalalyq PD baspasóz qyzmetiniń málimetinshe, qylmystyq is atalǵan jaıt negizinde qozǵalǵan.
«Qylmystyq kodekstiń 292-baby «Órt qaýipsizdigi talaptaryn buzý» boıynsha sotqa deıingi tergeý amaldary júrgizilýde. Birneshe saraptama taǵaıyndaldy. Órttiń shyǵý sebebi qosymsha tekseriletin bolady»,- deıdi Shymkent qalalyq PD baspasóz qyzmetiniń jetekshisi Ásel Sádenova.
Budan bólek, jarylystan sol aýmaqtaǵy turǵyn úılerge de zııan kelgeni anyqtalyp otyr. Jergilikti turǵyndardyń aıtýynsha, qatty jarylystan úıdiń terezeleri synyp ketken.
«Qatty jarylys boldy. Sodan úıdiń artqy jaǵynan qarasaq, gaz stansasy jarylǵan eken. Aınaldyrǵan 2-3 mınýttyń ishinde 4 tsısterna atyldy. Júgirip shyqtyq, baraıyq desek, jalynnyń ushqyny úıimizdiń aldyna deıin jetti. Áreń qashyp úlgerdik. Úıdiń janynda aınamyz bar edi, sony jaryp jiberdi. Bárimiz qorqyp qashtyq, sodan keıin taǵy 7-8 ret jarylys boldy», - deıdi Tassaı aýyly turǵyndarynyń biri.
Dárigerler bolsa, órtten kúıik shalǵan 20 jastaǵy jigittiń jaǵdaıyn óte aýyr dep baǵalaýda.
«Túsken kezdegi dıagnozy - termııalyq kúıiktiń óte aýyr dárejesi. Naýqas qazirgi tańda jansaqtaý bóliminde em qabyldap jatyr. Naýqasqa kerekti em-sharanyń bári jasalyp, qajetti dári-dármekpen 100 paıyz qamtylǵan. Naýqas sol jerde emin jalǵastyrady. Konsılıýmmen qaraǵan dárigerler naýqastyń jaǵdaıyn óte aýyr dep baǵalap otyr. Qazir de jaǵdaıy óte aýyr kúıinde»,- deıdi T.Orynbaev atyndaǵy joǵary qysymdy oksıgenatsııa ortalyǵynyń bas dárigeri Madına Ermahanbetova.
Eske salaıyq, búgin Shymkenttiń irgesinde jarylys bolyp, jekemenshik kompanııaǵa tıesili stansadaǵy 200 tekshe metrlik úsh rezervýar órtke oranǵan bolatyn. Kúıik shalǵan bir azamat Shymkent qalalyq oksıgenatsııa ortalyǵyna jetkizildi.