Gaz satyp alý baǵasyn 2024 jylǵa deıin ósirmeı ustap turý usynyldy
«Elimizdiń ishki naryǵyn gazben turaqty qamtamasyz etý maqsatynda 2014 jyly munaı ken oryndarynda óndiriletin gazdy satyp alýǵa memlekettiń artyqshylyq quqyǵy berilgen ulttyq operator ınstıtýty engizildi. Ulttyq operator – «QazaqGaz» UK» AQ gaz satyp alý baǵasy men magıstraldyq tasymaldaý tarıfterin negizge ala otyryp, taýarlyq gazdy kóterme saýdada ótkizýdi jáne gazben jabdyqtaýdyń biryńǵaı júıesi boıynsha gaz taratýdy birtutas dıspetcherleýdi júzege asyrady. Bul shema memleketke gaz baǵasyn ustap turýǵa múmkindik beredi» - dedi mınıstr.
Osy oraıda Bolat Aqsholaqov kóterme saýda ulttyq operator úshin zalal ákeletindigin alǵa tartady.
«Ol sýbsıdııalanady jáne eksporttyq túsimderge tikeleı táýeldi. Máselen, 2015-2021 jyldar aralyǵyndaǵy ulttyq operatordyń zalaly - 587 mlrd teńge. Buǵan deıin aıtqanymdaı, aǵymdaǵy baǵany QazaqGaz sýbsıdııalaıdy jáne bul álemdegi eń tómen baǵanyń biri bolyp esepteledi. Gazdandyrýdy damytý jaǵdaıynda tutynýdyń, onyń ishinde gazǵa naryqtyq baǵany tóleýge qabiletti jańa kommertsııalyq tutynýshylarmen tutynýdyń ósýine baılanysty ulttyq operatordyń zalaldary jyl saıyn artyp keledi. Búgingi kúni kóterme saýdadan bolǵan zalal tranzıttik jáne eksporttyq túsimderden artyq», - dedi ol.
Onyń aıtýynsha, osyǵan baılanysty mınıstrlik Úkimetke jer qoınaýyn paıdalanýshylardan gaz satyp alý baǵasyn 2024 jylǵa deıin ustap turý jóninde usynys engizgen.
«Atalǵan shara elimizdiń áleýmettik osal azamattary úshin shekti kóterme baǵalardy ustap turýǵa yqpal jasaıdy. Ulttyq operatordyń qarjylyq turaqtylyǵyn qoldaý úshin qazaqstandyq gaz resýrstarynyń shekteýliligin, bul rette halyqqa jáne iri áleýmettik mańyzy bar nysandarǵa bólshek baǵany ustaı otyryp, kóterme baǵany kezeń-kezeńimen kóterýge qatysty uzaqmerzimdi baǵalyq jáne tarıftik saıasat qajet», - dedi mınıstr.
