Gaz salasyn damytýdyń keshendi jospary ázirlenýde
«Memleket basshysynyń tapsyrmasyna sáıkes Energetıka mınıstrligi múddeli memlekettik organdarmen jáne gaz salasyndaǵy ulttyq operatormen birlesip, salany «qaıta júkteýge» baǵyttalǵan Gaz salasyn damytýdyń keshendi josparyn ázirleýde. Keshendi jospardyń jobasy mynadaı is-sharalar qamtıdy. Birinshi - geologııalyq barlaý men jańa jáne de qoldanystaǵy ken oryndarynda gaz óndirýdiń jańa jobalardyń esebinen gazdyń resýrstyq bazasyn ulǵaıtý. Gaz resýrstaryn ulǵaıtý úshin barlyq kezeńderde gaz jobalary úshin preferentsııalar jáne jetkizýshi ınfraqurylymdy salý qajet. Budan basqa, jer qoınaýyn paıdalanýshylar úshin yntalandyrý baǵasyn berý, sondaı-aq gaz aıdaý baǵdarlamalardyń oryndylyǵyn qaıta qaraý máseleleri pysyqtalýda», - dedi mınıstr.
Onyń atap ótýinshe, ekinshiden, mınıstrlik gazǵa baǵa belgileýdiń jańa modeli boıynsha jumys júrgizedi. Atalǵan modelde qazaqstandyq gaz resýrstarynyń shekteýliligi jáne kommertsııalyq tutynýshylarǵa baǵanyń naryqtyq baǵalar deńgeıine kóterilýi nazarǵa alý tıis.
«Úshinshiden, negizgi gaz tasymaldaý ınfraqurylymy keńes zamanynda salynǵan jáne qaýipsiz paıdalanýdy qamtamasyz etý úshin aýqymdy kúrdeli qarjy salymyn qajet etedi. Gaz tasymaldaý ınfraqurylymynyń jaı-kúıine tehnıkalyq aýdıt júrgizý, sondaı-aq qarjylandyrý kózderi men ınvestıtsııalardy qaıtarý tetikterin aıqyndaý kerek. Tórtinshiden, turaqty gazdandyrýdy jalǵastyrý úshin Gazdandyrýdyń bas shemasy ózektendiriletin bolady jáne gazdandyrý nysandaryn uttyq operatordyń teńgerimine berý boıynsha qaǵıdalar ońaılatylady. Jalpy, joǵaryda kórsetilgen is-sharalardy qabyldaýy 2030 jylǵa qaraı: taýarlyq gaz óndirisin 42 mlrd tekshe metrge deıin ulǵaıtýǵa; gaz ınfraqurylymynyń senimdiligin arttyrýǵa; halyqtyń áleýmettik osal toptary úshin baǵany ustap turýdy eskere otyryp, baǵa belgileýdiń qajetti modelin engizýge; eldiń gazdandyrý deńgeıin 65 paıyzǵa deıin ulǵaıtýǵa múmkindik beredi», - dedi Bolat Aqsholaqov.
