Gaz salasynda 25 jańa perspektıvaly ýchaske geologııalyq barlaýǵa engiziledi
ASTANA. KAZINFORM — Memleket basshysynyń tapsyrmasyna sáıkes, tabıǵı gazdyń resýrstyq áleýetin arttyrý maqsatynda Energetıka mınıstrligi «QazaqGaz» UK» AQ-men birlesip keshendi geologııalyq barlaý baǵdarlamasyn iske asyryp jatyr, dep habarlaıdy vedomstvonyń baspasóz qyzmeti.
Baǵdarlama salanyń shıkizattyq bazasyn nyǵaıtyp, eldiń energetıkalyq qaýipsizdigin qamtamasyz etýge baǵyttalǵan.
Ótken jyly ulttyq kompanııa Maldybaı, Shalqar, Aqqudyq, Soltústik-2 jáne Saraljyn ýchaskeleri boıynsha jer qoınaýyn paıdalaný jóninde 5 kelisimshartqa qol qoıdy.
Úsh jobaǵa strategııalyq seriktester tartyldy. Al eki ýchaskedegi jumystar beıindi enshiles uıymnyń kúshimen júrgiziledi.
Halyqaralyq yntymaqtastyq ta keńeıip keledi. CNPC kompanııasymen kelisimge qol qoıylyp, tikeleı kelissózder kezeńi aıaqtaldy. Qazirgi ýaqytta Soltústik-1 ýchaskesi boıynsha kelisimshart jasaý kútilip otyr. Sonymen qatar, Eni kompanııasymen Kamenkovskıı ýchaskesin birlesip zertteý jumystary bastaldy.
Chevron korporatsııasymen áriptestik aıasynda KT-III ýchaskesi boıynsha 3D-seısmobarlaý derekterin ınterpretatsııalaý jumystary sátti aıaqtaldy. Nátıjesinde joba ekonomıkalyq baǵalaý kezeńine ótti. Sonymen qatar, negizgi magıstraldyq gaz qubyrlary boıynda jańa jerasty gaz qoımalaryn salý boıynsha keshendi esep ázirlendi. Bul eldiń energetıkalyq turaqtylyǵyn kúsheıtýge múmkindik beredi.
2026 jyly resýrstyq bazany ıgerý qarqyny artady. Josparǵa sáıkes, Memlekettik jer qoınaýy qoryn basqarý baǵdarlamasyna 25 jańa perspektıvaly ýchaske engiziledi.
— Elimizde geologııalyq zertteýler men jer qoınaýyn paıdalanýda belsendi jumystar jalǵasady. Basym baǵyt — CNPC kompanııasymen Severnyı-1 ýchaskesi, Chevron kompanııasymen KT-III ýchaskesi boıynsha tolyqqandy kelisimsharttarǵa qol qoıý jáne Eni kompanııasymen Kamenkovskıı ýchaskesinde geologııalyq-geofızıkalyq zertteýlerdiń belsendi kezeńine ótý, — delingen habarlamada.
Sonymen qatar, izdestirý jumystarynyń geografııasy Ortalyq Kaspıı mańy, Teńiz jáne Shý–Sarysý basseınderinde jer qoınaýyn geologııalyq zertteýge arnalǵan lıtsenzııa alýmen keńeıedi. Kompanııa Balqash shógindi basseıniniń keleshegin egjeı-tegjeıli taldap, aldaǵy geologııalyq barlaý baǵdarlamalaryn naqtylaıdy.
Osydan buryn geologııalyq barlaý jumystaryn júrgizýge 40,7 mlrd teńgeden astam qarajat bólinetinin jazdyq.