Gaz óndirý ulǵaısa da, kógildir otyn tapshy – Oljas Bektenov
ASTANA. KAZINFORM – Úkimet basshysy Oljas Bektenov jańa gaz óndirý ken oryndaryn damytý jáne geologııalyq barlaýǵa ınvestıtsııa tartýdyń baıaý júrip jatqanyn aıtyp, Energetıka mınıstrligine birqatar tapsyrma júktedi.
«Gaz óndirý men óńdeý kóleminiń ulǵaıýyna qaramastan bizdiń elimizde kógildir otynnyń tapshylyǵy bolyp otyr. Qashaǵanda jáne Jańaózende gaz óńdeý zaýyttaryn salý uzaqqa sozylyp ketti. Jańa ken oryndaryn damytý jáne geologııalyq barlaýǵa ınvestıtsııalar tartý da baıaý júrip jatyr. Sondyqtan Energetıka mınıstrligi men «QazaqGaz» kompanııasyna gaz óńdeý zaýyttaryn salý jáne jańa gaz ken oryndaryn ıgerý boıynsha naqty jol kartalaryn ázirleýdi tapsyramyn», - dedi Oljas Bektenov Úkimet otyrysynda.
Sondaı-aq, Úkimet basshysy Prezıdent Ulttyq quryltaı otyrysynda halyqty gazben qamtamasyz etý jáne gaz qubyrlaryn jańǵyrtý jóninde tapsyrma bergenin eske saldy.
«Osy maqsatqa «Samuryq-Qazyna» qory 105 mlrd teńge bólip otyr. Energetıka mınıstrligine jergilikti atqarýshy organdarmen birlesip, bólinetin qarajattyń ýaqytyly ıgerilýin qamtamasyz etýdi jáne jyldyń sońyna deıin jeliler salý boıynsha barlyq qajetti jumystardy aıaqtaýdy tapsyramyn», - deıdi ol.
