Gaz óndirý qýatyn arttyrý qajet — Úkimet basshysy
ASTANA. KAZINFORM — Eldiń energııa resýrstaryna degen suranysyn qanaǵattandyrý úshin gaz óndirý qýatyn arttyrý qajet. Bul týraly Úkimet otyrysynda Premer-mınıstr Oljas Bektenov aıtty.
— Munaı óndirýdiń josparly deńgeıin qamtamasyz etý úshin Energetıka mınıstrligine iri jer qoınaýyn paıdalanýshylarmen óndiris kólemin ulǵaıtý sharalary boıynsha kelissózder júrgizýdi tapsyramyn. Eldiń energııa resýrstaryna degen suranysyn qanaǵattandyrý úshin gaz óndirý qýatyn arttyrý qajet. Energetıka mınıstrligine QazaqGaz jáne QazMunaıGaz kompanııalarymen birlesip, bıyl Qashaǵanda kólemi 1 mlrd tekshe metr bolatyn gaz óńdeý zaýytynyń qurylysyn aıaqtaýdy, al kelesi jyldyn basynda Jańaózendegi zaýytty paıdalanýǵa berýdi tapsyramyn, — dedi ol.
Úkimet basshysy gaz tasymaldaý júıesine erekshe nazar aýdarý qajettigin basa aıtty.
— «Beıneý — Bozoı — Shymkent» gaz qubyrynyń ekinshi jelisin tabysty iske asyrý strategııalyq mindet sanalady. Bul qoljetimdi gaz kólemin arttyrýǵa múmkindik beredi. Energetıka mınıstrligi osy oraıda tıisti úılestirý men qatań baqylaýdy qamtamasyz etýi qajet, — dedi Oljas Bektenov.
Buǵan deıin Úkimet basshysy mal sharýashylyǵynda ónimdilikti ulǵaıtýdy tapsyrǵanyn jazǵan edik.
