Gaz quıý beketterin tekserýge kedergi kóp - TJK
NUR-SULTAN. QazAqparat - Qazaqstandaǵy gaz quıý stansalarynyń jumysyn retteýge qoldanystaǵy zańnama qaýqarsyz. Mundaı pikirdi Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.
Vladımır Bekker Qyzylorda qalasyndaǵy gaz quıý stansasynyń aýmaǵynda bolǵan tosyn jaıt týraly málimet berdi. Aıtýynsha, qaýipsizdik erejeleriniń saqtalmaýy tótenshe oqıǵaǵa túrtki bolǵan.
«Gaz quıý stansasynda janarmaıyn toltyryp jatqan avtobýstan gaz aǵyp, ol tutanyp ketken. Bir adam gaz kezeginde turmystyq ballondy toltyryp alý úshin turǵany anyqtaldy. Ondaı stansalarda turmystyq ballondy toltyrýǵa tyıym salynǵan. Ol tyıymdy turǵyn da, stansa ıesi de eskermegen», - deıdi maman.
Vladımır Bekker gaz quıý stansalaryna degen suranys artqanymen, olardyń jumysyn retteý tetikteri jetildirilmeı jatqanyn da jetkizdi.
«Jańadan paıda bolǵan stansany 3 jyldan keıin ǵana teksere alamyz. Oǵan deıin kemshiligi kózge uryp tursa da, bas suǵýǵa haqymyz joq. Al 3 jyl tola bergende ıesi aýysyp ketse, tekserý taǵy 3 jylǵa shegeriledi. Mine, nysan ıeleri úshin tekserýden boı tasalaýdyń osyndaı joldary bar. Biz Bas prokýratýraǵa usynys jasadyq kólikke gaz quıý stansalaryn jospardan tys tekserýge ruqsat berilýi kerek. Qazir jospardaǵylaryn ǵana tekserýmen shektelip kelemiz»,- deıdi komıtet tóraǵasy.
