Gaz quıý beketindegi órt pen adam ólimine baılanysty jumys toby quryldy - Ekibastuz ákimdigi

EKІBASTUZ. QazAqparat – Ekibastuz qalasyndaǵy gaz quıý stantsııasynda bolǵan órt pen ondaǵy adam ólimine baılanysty jumys toby quryldy, dep habarlaıdy QazAqparat qala ákimdigine silteme jasap.

«Qala ákimdiginiń qaýlysymen 23 janar-jaǵarmaı jáne 11 gaz quıý stantsııasy qyzmetine monıtorıng júrgizý jónindegi jumys toby quryldy. Jumys tobyna Ekibastuz qalasy ákiminiń orynbasary tóraǵalyq etedi. Quramynda qalalyq tótenshe jaǵdaılar basqarmasynyń bastyǵy, jergilik polıtsııa qyzmetiniń bastyǵy, kásipkerlik, jer qatynastary, turǵyn úı ınspektsııasy, sáýlet, memlekettik kirister jáne sanıtarııalyq-epıdemologııalyq baqylaý basqarmalarynyń basshylary bar. Jumys toby búgin mindetin atqarýǵa kiristi», - delingen ákimdik málimdemesinde.

Sondaı-aq, órt qaýipsizdigi erejeleriniń buzylýynan adam ólimi tirkelýine baılanysty 2 qylmystyq is qozǵalǵan.

Eske salsaq, búgin saǵat 13:24-te Ekibastuz qalasy Qonaev, 5 kóshesinde ornalasqan AGQB gaz quıylǵan 4 rezervýar jandy. Oqıǵa ornynda shamamen 40 gaz ballon bolǵan. Órt jaqyn mańdaǵy «Ferýza» azyq-túlik dúkenine ótip, shamamen 200 sharshy metr aýmaqtaǵy shatyr, sondaı-aq 20 sharshy metr aýmaqtaǵy sý munarasynyń shatyry jandy. Órt 15:00-de oqshaýlaýlanyp, 15:44-te sóndirildi.

Tsısternanyń janynan jas jigittiń denesi tabylǵany málim boldy. Marqumnyń kim ekeni týraly málimet berilmedi.