Gaz qondyrǵylaryna sapasyz qyzmet kórsetken uıymdar jazalanýy múmkin

NUR-SULTAN. QazAqparat – QR Premer-Mınıstriniń birinshi orynbasary Roman Sklıar Májilis depýtattarynyń úı ishinde qoldanylyp júrgen gaz qondyrǵylaryna qyzmet kórsetetin uıymdardyń jaýapkershiligin arttyrý usynysyn qoldaıtynyn málim etti, dep habarlaıdy QazAqparat tilshisi.

Bul týraly ol depýttatyq saýalǵa joldaǵan jaýabynda jazdy.

«Tutastaı alǵanda, úı ishindegi gaz jabdyǵyna tehnıkalyq qyzmet kórsetý jónindegi mekemelerge júktelgen mindetterdi tıisinshe oryndamaǵany úshin jaýapkershilikti qatańdatý khqajet degen ustanymmen Úkimet kelisedi», - dep jazylǵan vıtse-premerdiń jaýabynda.

Aıtýynsha, 27 sáýirde tótenshe jaǵdaılardyń aldyn alý jáne olardy joıý jónindegi vedomstvoaralyq memlekettik komıssııanyń otyrysynda gaz qondyrǵylaryn qaýipsiz paıdalaný boıynsha birqatar másele talqylanyp, pysyqtalǵan.

Olar:

- gaz jáne gaz jabdyqtaryn qaýipsiz paıdalaný erejelerin saqtaý boıynsha halyqpen uıymdastyrýshylyq-praktıkalyq is-sharalar jáne aqparattyq-profılaktıkalyq jumys júrgizý;

- tutynýshynyń gaz tutyný júıesi nemese gaz jabdyǵynyń jaı-kúıi qanaǵattanarlyqsyz bolǵan jaǵdaıda gazben jabdyqtaýdy toqtata turý bóliginde gaz jáne gazben jabdyqtaý salasyndaǵy quqyqtyq qatynastardy retteý tıimdiligin arttyrý;

- gaz tutyný júıelerin qaýipsiz paıdalaný talaptarynyń saqtalýyn memlekettik baqylaıtyn ınspektorlyq quramnyń shtat sanyn ulǵaıtý;

- gaz jáne gazben jabdyqtaý salasyndaǵy qoldanystaǵy zańnama talaptaryn buzǵany jáne oryndamaǵany úshin tulǵalardy ákimshilik jaýapkershilikke tartý boıynsha zań normalaryn qoldaný jumysyn kúsheıtý.

QR Energetıka mınıstri Bolat Aqsholaqovtyń málimeti boıynsha, ballonǵa quıyp satylatyn gaz baǵasy janarmaı stansasyndaǵy baǵamen teńestirilmek.